Bakılift” İB-nin sayca 3-cü, yeyintidə 1-ci struktur vahidi
Bakıda binadaxili mühəndis avadanlıqlarına aid lift qurğularının müntəzəm texniki xidmətinin və təmirinin təşkili ilə bağlı lift təsərrüfatının, xüsusi Bakı şəhərində daha çoxluq təşkil etdiyini nəzərə alaraq, “Lifttəmir” İstehsalat Birliyi yaradılmışdır. 19.06.2017-ci il tarixli 274 nömrəli Sərəncama əsasən Bakı Şəhər İcra Hakimiyyətinin struktur vahididir. “Lifttəmir” İB Bakı şəhərinin 11 rayonunda yerləşən və Dövlət Mənzil Fondundakı Mənzil Kommunal Birliklərinin balansında olan binalarda quraşdırılmış beş mindən artıq lift qurğusuna xidmət göstərir. Bu xidmətlər isə, İB-nin tərkibinə daxil olan 6 idarə – “Bakılift-1”, “Bakılift-2”, “Bakılift-3”, “Bakmənzilavtomat”, “Funikulyor” və TEMP dövlət müəssisələri tərəfindən göstərilir. “Lifttəmir” İB-nin sabiq rəisi Qüdrət Şükürovun gözqamaşdıran sərvəti, korruptiv əməlləri, ermənilərlə işbirliyi qurması yalnız övladına ikinci dəfə 400 minlik qalmaqallı toy mərasimi təşkil edəndən sonra araşdırılmağa başladı. Bəs görəsən, Qüdrət Şükürovu rəhbər vəzifədə Xalid Ələkbərov əvəzləyəndən sonra "Lifttəmir” İstehsalat Birliyində nə dəyişib? Göz qabağında olan Funikulyorun təmirini, lift işçilərinin boynuna qalstuk taxılmasını istisna etsək, demək olar ki, ümumilikdə götürəndə müsbət istiqamətdə əhəmiyyətli dəyişikliklər müşahidə olunmur. Xüsusilə də köhnə binalarda lift sarıdan sakinlərin narazılıqları çoxalmaqdadır. Köhnə liftlərin yeniləri ilə əvəz olunması prosesi yubanır, yeni lifti quraşdıranlar səriştəsizlik göstərir. Mətbuat yazır ki, binalarda liftin qapısını söküb yerinə heç bir təhlükəsizlik nişanı, xəbərdarlıq lenti, təhlükəsizlik lenti, təhlükəsizlik məhəccəri quraşdırmırlar. Ona görə ki, işlər ixtisaslaşmış şirkətlərə deyil, qabaqcadan razılaşdırılmış şəkildə yetərincə bazası olmayan firmalara verilir. “Satınalmalar haqqında” AR Qanununa zidd olaraq, tenderlərdə təcrübəsiz, maliyyə imkanları məhdud, vergi borcları olan təsadüfi firmalar qalib çıxarılır. Buna misal olaraq, “Lifttəmir” İstehsalat Birliyinin 3 Saylı Bakı Lift İxtisaslaşdırılmış İstehsalat İdarəsi tərəfindən keçirilmiş satınalma prosedurları ətrafında apardığımız araşdırmanın nəticəsini təqdim edirik: Dövlət satınalmalarının vahid internet portalında 3 Saylı Bakı Lift İxtisaslaşdırılmış İstehsalat İdarəsi tərəfindən lift ehtiyat hissələrinin satın alınması üzrə keçirilmiş 3 açıq tenderin nəticələri açıqlanıb. Lift ehtiyat hissələrinin satın alınması üzrə 04.11.2023-cü ildə başlanılmış açıq tenderdə zərflər paketi 08.12.2023-cü ildə açılmış “LİFT-SERVİS N.” Məhdud Məsuliyyətli Cəmiyyət ilə 50.919,36 manat məbləğində satınalma müqaviləsinin bağlanılması barədə məlumat 28.12.2023-cü il tarixdə açıqlanmışdır. Lift ehtiyat hissələrinin satın alınması üzrə 14.07.2023 -cü ildə başlanılmış açıq tenderdə zərflər paketi 15.08.2023-cü ildə açılmış “LİFT-SERVİS N.” Məhdud Məsuliyyətli Cəmiyyət ilə 243.400,96 manat məbləğində satınalma müqaviləsinin bağlanılması barədə məlumat 28.12.2023-cü il tarixdə açıqlanmışdır. Lift ehtiyat hissələrinin satın alınması üzrə 14.07.2023 -cü ildə başlanılmış açıq tenderdə zərflər paketi 15.08.2023-cü ildə açılmış “LİFT-SERVİS N.” Məhdud Məsuliyyətli Cəmiyyət ilə 50.919,36 manat məbləğində satınalma müqaviləsinin bağlanılması barədə məlumat 28.12.2023-cü il tarixdə açıqlanıb. Dövlət satınalmalarının vahid internet portalına yerləşdirilmiş məlumatlardan da göründüyü kimi, 3 Saylı Bakı Lift İxtisaslaşdırılmış İstehsalat İdarəsinin Tender Komissiyası açıq tenderləri ayrı-ayrı vaxtlarda keçirmiş, lakin bağlanmış müqavilələr barədə məlumatları bir gündə, 28.12.2023-cü il tarixdə açıqlamışdır. Qeyd edək ki, 3 Saylı Bakı Lift İxtisaslaşdırılmış İstehsalat İdarəsi əvvəlki illərdə də “LİFT-SERVİS N.” Məhdud Məsuliyyətli Cəmiyyət ilə lift ehtiyat hissələrinin satın alınması üzrə bir neçə satınalma müqaviləsi bağlayıb. Kommersiya qurumunun hüquqi şəxslərin dövlət reyestrinə daxil edilmiş məlumatlarında “LİFT-SERVİS N.” (VÖEN 2000853641) Məhdud Məsuliyyətli Cəmiyyətinin İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində 19.10.2006-cı il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanı BAKI ŞƏHƏRİ, XƏTAİ RAYONU, NƏSRƏDDİN TUSİ, ev 23, m. 82, qanuni təmsilçisinin isə Abışev Natiq Qaraş oğlu olduğu göstərilir. Göründüyü kimi, 3 Saylı Bakı Lift İxtisaslaşdırılmış İstehsalat İdarəsi “LİFT-SERVİS N.” daim işbirliyində olub. Bu da keçirilmiş açıq tender prosedurlarında saxtakarlıq hallarına yol yerildiyinə əsaslı şübhələr yaradır. Belə ki, tender prosedurlarının keçirilməsi zamanı daim bir şəxsə və ya şirkətə üstünlük verilməsi satın alınan malların ehtimal olunan qiymətinin düzgün müəyyən edilməməsinə və bir sıra qanun pozuntularına yol açmasına şübhə doğurur. Bundan əlavə Dövlət Vergi Xidmətinin rəsmi saytından əldə etdiyimiz məlumata görə 3 Saylı Bakı Lift İxtisaslaşdırılmış İstehsalat İdarəsi üzərinə düşən vergi öhdəliklərini də yerinə yetirə bilmir. Belə ki, hazırki günə 3 Saylı Bakı Lift İxtisaslaşdırılmış İstehsalat İdarəsinin (VÖEN 2000310381) dövlətə 1116927.53 manat vergi borcu var. Qeyd edək ki, “Baklift-3” İxtisaslaşdırılmış İstehsalat İdarəsinin rəisi Dadaş Nəbiyevdir. O, burada çoxdan çalışır. 3 saylı “Baklift” İxtisaslaşdırılmış İstehsal İdarəsinin abonent şöbəsinin rəisi olub. İdarənin rəisi vəzifəsinə “Lifttəmir “ İB-nin rəisi Xalid Ələkbərov tərəfindən gətirilib. Görünən odur ki, hər iki rəhbər vəzifəli şəxs birləşərək “Baklift-3” İstehsalat İdarəsinə ayrılan pulları liftlərə ehtiyat hissələrinin satın alınması adı altında talayır, dövlətin vergisini də vermirlər.
Vahid Məmmədov. Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!