Nəhayət, 3 ilə yaxın müddətdən sonra “anladı”lar ki, Azərbaycan Respublikası ərazisində “Stepanakert” yox, Xankəndi var. Söhbət Rusiyanın 10 noyabr 2020-ci il tarixli üçtərəfli razılaşmaya əsasən Azərbaycan Respublikasının Yuxarı Qarabağ ərazisinin bir hissəsi və “Laçın dəhlizi” adlanan torpağına yeridilmiş “sülhməramlı” kontingentdən və onların tabe olduğu Rusiya Müdafiə Nazirliyindən gedir...
DİA.AZ-ın xəbərinə görə, Moderator.az-ın dünənki araşdırmasından bəlli olmuşdu ki, Rusiya Müdafiə Nazirliyinin rəsmi saytının Azərbaycan Respublikası ərazisindəki “sülhməramlı” kontingentə aid bölməsindəki oktyabrın 2-ə aid xəbər bülletenində son 3 ilə yaxın müddətdəkindən fərqli olaraq ““Stepanakert” və ardınca mötərizədə (Xankəndi) yazılıb(bax: burada).
Dünən – oktyabrın 3-də axşam saatlarında isə eyni saytın həmin bölməsində təqdim olunmuş “sülhməramlı” kontingentin dislokasiya xəritəsində “Stepanakert” sözünün altında “Xankəndi” də yazılıb... Nəhayət, bunu da görməyə nail olduq...
Lakin, təəssüf ki, “sülhməramlı”ların xəbər bülletenində və gündəlik dislokasiya xəritələrində “Stepankert”lə yanaşı, “Dağlıq Qarabağ”, “Mardakert”(Ağdərə), “Martuni”(Xocavənd), “Levonarx”(Göyarx), “Xramort”(Pirlər), “Qetavan”(Qozlukörpü) və s. toponim təhrifləri hələ də davam etdirilir...
P.S. Deməli, Rusiya MN elə “sülhməramlı”ların ərazimizə daxil olduğu ilk günlərdən və ya heç olmasa, Azərbaycan mediası, ictimaiyyəti və Müdafiə Nazirliyinin ardıcıl tələblərindən sonra nəinki Xankəndinin, digər toponimlərimizin də adını düzgün qeyd edərdilər. Amma etmirdilər... Nəyə görə? Çünki imperiya ambisiyaları, imperiya təfəkkürü və təkəbbürü buna imkan vermir... Azərbaycanın müstəqilliyini, öz torpaqları, xüsusən də Qarabağ üzərində suverenliyini sözün əsil mənasında tanımağa, xalq dilində desək, canları çıxır...
P.P.S. Onsuz da toponimlərimizi düzgün yazmaqla da canlarını qurtaran deyillər, torpaqlarımızdan son əsgərlərinədək çıxmayınca əl çəkən deyilik...
Nyus.Az
