Nərimanov rayonunda növbəti qanunsuzluq faktı ictimai narazılıq doğurur. 23 saylı musiqi məktəbinin yaxınlığında dəmir konstruksiyalardan ibarət artırma işlərinin aparılması bir daha göstərir ki, paytaxtın mərkəzi ərazilərində belə qanunlar "fərdi" şəkildə tətbiq olunur.
Əldə etdiyimiz məlumata görə, sözügedən tikinti üçün heç bir rəsmi icazə sənədi alınmayıb. Buna baxmayaraq, işlər sürətlə davam etdirilir, hətta piyadalar üçün nəzərdə tutulmuş səki belə zəbt olunaraq faktiki olaraq vətəndaşların istifadəsindən çıxarılıb. Bu isə açıq-aşkar qanun pozuntusu olmaqla yanaşı, şəhərsalma normalarının kobud şəkildə tapdalanması deməkdir.
Daha düşündürücü məqam isə iddialarla bağlıdır. Bildirilir ki, bu qanunsuz tikinti rayon rəhbərliyinin “xeyir-duası” ilə həyata keçirilir. Əgər bu iddialar doğrudursa, o zaman məsələ təkcə bir tikinti pozuntusu deyil, rayonda özbaşınalığın göstəricisidir.
Sual yaranır: paytaxtın mərkəzində, dövlət qurumlarının gözü qarşısında aparılan bu qanunsuz işlər niyə dayandırılmır? Aidiyyəti qurumlar hara baxır? Niyə sadə vətəndaşa qarşı dərhal tədbir görülür, amma belə açıq-aşkar qanunsuzluqlar illərlə davam edə bilir?
Bu cür halların artması cəmiyyətdə haqlı narazılıq yaradır və qanun hamı üçün eynidirsə, o zaman bu tikintiyə də eyni prinsip tətbiq olunmalıdır.
Nisa Şirvanlı.
Nyus.Az
