FHN, şəhərsalma, icra — hamısı susur: Sumqayıtda nə baş verir?
Sumqayıt şəhərinin 6-cı mikrorayonunda, Zülfü Hacıyev küçəsi 69–71 ünvanında aparıldığı iddia olunan qanunsuz tikinti bir daha sual doğurur: Sumqayıtda qanun var, yoxsa hər kəs öz qaydasını tətbiq edir? Məlumdur ki, Azərbaycanda tikinti fəaliyyəti özbaşına həyata keçirilə bilməz. Azərbaycan Respublikasının Şəhərsalma və Tikinti Məcəlləsi açıq şəkildə göstərir ki, müvafiq icra orqanlarının icazəsi olmadan tikinti aparılması qanun pozuntusudur və ciddi cərimələr, hətta söküntü ilə nəticələnə bilər.Bəs onda bu tikinti hansı əsasla aparılır? Qanunvericiliyə görə tikintiyə icazə prosesi bir neçə qurumun razılığı ilə həyata keçirilir: icra hakimiyyəti, FHN, şəhərsalma qurumları və digər aidiyyəti orqanlar bu prosesdə iştirak etməlidir. Amma real vəziyyət tamam fərqlidir. Əgər göstərilən ünvanda tikinti doğrudan da icazəsiz aparılırsa, bu artıq təkcə bir sahibkarın qanun pozuntusu deyil — bu, nəzarət mexanizminin tam iflasıdır. Haradadır FHN,haradadır şəhərsalma nəzarəti,haradadır əmlak xidməti? Və ən əsası — niyə Sumqayıt Şəhər İcra Hakimiyyəti susur? Oxşar hallar artıq ölkədə dəfələrlə müşahidə olunub: qanunsuz tikinti göz qabağında aparılır, amma məsul qurumlar ya “görmür”, ya da görmək istəmir. Bu isə cəmiyyətdə haqlı olaraq belə bir fikir formalaşdırır,ya bu tikintiyə kimlərsə göz yumur, ya da arxasında ciddi maraqlar dayanır.Qanun çox aydındır:icazəsiz tikinti dayandırılmalıdır,pozuntular aradan qaldırılmasa, obyekt sökülməlidir,məsul şəxslər cərimələnməlidir.Hətta belə tikililərin elektrik şəbəkəsinə qoşulması da qadağandır. Sumqayıtın mərkəzində baş verən bu hadisə tək bir ünvanın problemi deyil. Bu, artıq sistemli problemə çevrilən “qanunsuz tikinti sindromu”nun növbəti nümunəsidir. Əgər bu tikinti qanunsuzdursa və dayandırılmırsa, bu artıq təkcə tikinti qaydalarının yox, tikintilərə nəzarət idarəçiliyinin nüfuzunun tapdalanmasıdır.Və ən əsas sual budur,bu tikintiyə kim icazə verib — qanun, yoxsa qeyri-rəsmi “razılaşmalar”?
Nyus.Az
