Dolaşan söz-söhbətlərdə o da bildirilir ki, sabiq rəis bu yöndə məqsədinə çatmaq üçün, nə az, nə də çox, düz 2 milyon manat pulunun başından keçməyə də hazırlaşır
Bugünlərdə redaksiyamıza Bərdə şəhər sakinləri arasında dolaşan söz-söhbətlər əsasında, hər kəsin marağını cəlb edə biləcək sensasion bir məlumat daxil olub. Düzdür, ilk əvvəl daxil olan məlumatın ciddiliyinə heç bir halda əhəmiyyət vermədik və yayılan söz-söhbətlərin əhəmiyyətsiz olması qənaətinə də gəldik. Amma, günlər keçdikcə daxil olan məlumatın müəyyən çevrələrdə müzakirə olunmasını eşitdikcə belə qərara gəldik ki, bu yöndə müəyyən jurnalist araşdırmalarımızı həyata keçirək. Bəli, redaksiyamız Bakı şəhərində fəaliyyət göstərsə də, biz mümkün imkanlarımızdan istifadə etdik ki, daxil olan məlumat haqda lazımi dəqiqləşdirilmələri apara bilək. Bir sözlə, apardığımız araşdırmalar zamanı belə bir məlumat əldə etdik ki, Bərdə Suvarma Sistemləri İdarəsinin sabiq rəisi Sərdar Nəriman oğlu Əhmədov, təqribən bir il bundan əvvəl daşıdığı vəzifəsindən uzaqlaşdırılsa da, bu gün o, daha strateji posta sahib olmaq iddiasına düşüb. Əslinə baxsan, bu şəxsin belə bir iddiaya düşməsinə təbii baxmaq gərəkdir. Çünki, Azərbaycan Respublikasının Konstitusiyasında qeyd olunub ki, cinsindən asılı olmayaraq hər kəs öz bacarığına görə dövlət hakimiyyəti orqanlarında işləmək hüququna malikdir. Bəli, o halda ortaya belə bir sual çıxır ki, əgər 12 noyabr 1995-ci ildə qəbul olunmuş Konstitusiyamızda hər kəsə, o cümlədən Sərdar Əhmədova da belə bir hüquq verilibsə, nədən bu şəxs ona verilmiş hüquq və ixtiyardan lazımınca istifadə etməsin? Amma, məsələnin incə bir tərəfi var. Yəni, bu şəxsin Azərbaycan Respublikası Prezidentinin 03 mart 2011-ci il tarixli Sərəncamı əsasında, Bərdə Rayon İcra Hakimiyyətinə başçı təyin olunan Vidadi İsayevin daşıdığı vəzifəsinə göz dikdiyi söylənilir. Düzdür, bu haqda dəqiq nəsə deyə bilməsək də, deyəcəyimiz o olacaq ki, bu gün yerli sakinlər arasında belə bir söz-söhbətlər dolaşmaqdadır. Baxmayaraq ki, media üzərindən apardığımız araşdırmalar zamanı belə bir məlumata da rast gəldik ki, illər öncə Bərdə Suvarma Sistemləri İdarəsinə rəhbərlik edən bu şəxs, geniş ictimaiyyət arasında bugünkü icra başçısı Vidadi İsayevin “qara kassa”sı kimi də tanınıb. (Mənbə: Teref.az saytı) O halda ortaya belə bir sual da çıxır ki, görəsən Sərdar Əhmədovun belə bir iddiya düşməsinin kökündə nələr durur? Bu məsələ ilə də bağlı belə bir ehtimallar da söylənilir ki, bu şəxs cənab Əhməd Əhmədzadənin ən etibarlı kadrlarından biri olub və bu gün o, Bərdə RİH-nin başçısı olmaq üçün mümkün variantlardan lazımınca istifadə etməkdədir. Hətta, dolaşan söz-söhbətlərdə o da bildirilir ki, Bərdə Suvarma Sistemləri İdarəsinin sabiq rəisi bu yöndə məqsədinə çatmaq üçün, nə az, nə də çox, düz 2 milyon manat pulunun başından keçməyə də hazırlaşır. Bəli, bu yöndə məlumatlar diqqəti cəlb edən məlumatlar olduğundan, bir neçə gün bundan öncə əməkdaşımız Sərdar Əhmədovla əlaqə saxlayıb, bu kimi məsələlərə münasibətini öyrənmək istəyir. Maraqlı və düşündürücü hal o olur ki, telefon danışığı zamanı Suvarma Sistemləri İdarəsinin sabiq rəisi söylənilənləri nə təsdiq, nə də ki, inkar edir. Yalnız o, “Sizə bunu kim deyib, həmin şəxsin adını mənə bildirin, sizin hörmətinizi çatdıraram” deməklə kifayətlənir. Bu cür cavabdan sonra bizdə belə bir qənaət də formalaşdı ki, deməli Sərdar Əhmədovun iddiası reallığa yaxın söz-söhbətlərdir. Yəni, atalar demişkən: “Od olmayan yerdən tüstü çıxmaz”. Deməli, yaxın vaxtlarda icra başçısı Vidadi İsayev daşıdığı vəzifəsinə “əlvida” deməli olacaq, sabiq idarə rəisi Sərdar Əhmədov isə arzusunu “çin edəcək”. Yazıda adı çəkilən hər kəsin mövqeyini dinləməyə hazırıq.
Nyus.Az.
