RƏŞAD MAHMUDOV ZAQATALA MEŞƏSININ “YUYULMASINA” ÜMID EDIR
Bu yay Zaqatalada dağlıq ərazidə yeni təbii göl yarandı. Göl Zaqatalanın Mişleş kəndi yaxınlığında, Qaraqaya ərazisində, Çayarxac dərəsində əmələ gəlib. Gölün yaranmasına rayona yağan aramsız yağışlar nəticəsində baş verən sürüşmə səbəb olub və sıldırım qaya uçaraq dərəni bağlayıb.
Bir qrup sakin iddia edir ki, aramsız yağışların qayanı uçurması nəticəsində əmələ gələn həmin göl ciddi təhlükə mənbəyidir. Belə ki, leysan yağışlarda göl daşa bilər və nəticədə rayonu sel basar. Buna görə də gölü təhlükə olmadan dağıtmaq lazımdır.
Gölün yarandığı yerin aid olduğu Zaqatala Meşə Mühafizəsi və Bərpası Müəssisəsinin direktoru Rəşad Mahmudov isə açıqlamasında bildirib ki, yeni əmələ gələn göl təhlükə mənbəyi deyil, işçiləri gedib gölə baxış keçiriblər: “Qeyd edim ki, onu dağıtmaq da asan iş deyil. Çox ucqar yerdədir, ora texnika gedə bilməz. Amma hazırki vəziyyətdə onu dağıtmağa ehtiyac yoxdur.»
Ola bilsin ki, hazırda gölün qalmasının heç bir təhlükəsi yoxdur. Amma gələcəkdə güclü sellər olarsa, qarşısı açılıb ciddi təhlükə yarada bilər. Ekoloq Ənvər Əliyev isə sonradan yaranan göllərin təhlükə mənbəyi olduğunu deyib: «Əgər o göl hansısa fəsadlar törədəcəksə, yaşayış məntəqələrinə ziyan vuracaqsa, indidən yavaş-yavaş qurutmaq lazımdır. Təcrübə göstərir ki, sonradan yaranmış belə göllər böyük fəlakətlər törədib. Orada tədqiqat aparılmalıdır. Mütəxəssislərin məsləhəti ilə su yavaş-yavaş boşaldılmalıdır. Əks-təqdirdə güclü yağıntı nəticəsində böyük su kütləsi ilə aşağı ərazilərə ziyan vura bilər.” –deyə, ekoloq bildirib.
Elə isə görəsən Rəşad Mahmudovun gölün qurudulmasının əleyhinə çıxmasının səbəbi nədir. Təxmin etmək olar ki, o, gölün gələcəkdə daşmasına və özünün Zaqatala meşələrində rəvac verdiyi və verəcəyi qanunsuzluqların izini yuyacağına ümid bəsləyir. Faydalı perspektivdir, söz buraxa bilər ki, ağacları sel aparıb.
Xatırladaq ki, əvvəllər istər Hüseyn Bağırovun nazir olduğu dönəmdə, istərsə də Muxtar Babayev nazir vəzifəsinə gələndən sonra Zaqatala MMBM – nin rəhbər və digər vəzifəli şəxsləri qanunsuz əməlləri ucbatından məsuliyyətə cəlb olunmuş, bir çoxları tutduqları vəzifədən qovulmuşlar. Amma direktor müavini işləyən Rəşad Mahmudov hansısa görünməz havadarının sayəsində nəinki vəzifədə qala bildi, hətta irəli də çəkildi. Eyni qanunsuzluqlar indi də davam etməkdədir. Belə ki, yaş ağaclar kök üstündən kəsilir, mebel sexlərinə satılır. “Plan” xatirinə bir-iki faktı aşkarlamaq lazım gələndə də qırıntıları oduncaq kimi qeydə alırlar ki, təqsirkarlara cinayət deyil, inzibati cəza növü tətbiq olunsun.
Mövzuya qayıdacağıq. //dəryaz//
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq! Nyus.Az