Rusiya Federasiyası Ukraynaya hərbi müdaxilə olacağı təqdirdə həbslər və sui-qəsd kampaniyası planlaşdırır. Kremlin hazırladığı siyahılara Ukraynanın tanınmış siyasətçiləri, fəalları, Ukraynaya səfər etmiş Rusiya və Belarus dissidentləri daxildir. Bu barədə məlumatlı mənbələrə istinadən Amerikanın "Foreign Policy" nəşri yazıb.
Nyus.Az virtualaz.org-a istinadən bildirir ki, materialda işğaldan sonra Rusiya tərəfinin hədə-qorxu və repressiyalara əl atmaq niyyətində olduğu deyilir. Moskva əvvəlki kampaniyalarında dəfələrlə bu cür üsullardan istifadə edib. Jurnalın mənbələri iddia edir ki, ABŞ hakimiyyət orqanları bu məlumatı məqsədyönlü şəkildə ukraynalı tərəfdaşlarla və bu vəziyyətə təsir edə biləcək şəxslərlə bölüşürlər.
ABŞ prezidentinin administrasiyasında Moskvanın tərtib etdiyi siyahıların nə dərəcədə formallaşdırıldığını görəndə heyrətə gəliblər. Bu siyahıda, çox güman ki, Rusiya rejimi üçün təhlükə yarada biləcək hər kəs var.
Siyahıların tərtib edilməsində Rusiya xüsusi xidmət orqanları iştirak edib. Məqalədə deyilir ki, Belarus müxalifətinin lideri, prezidentliyə keçmiş namizəd Svetlana Tixanovskayanın komandası bildirib ki, Ukraynada yaşayan Belarus vətəndaşlarını Rusiyanın hücumu zamanı necə hərəkət etmələri barədə məlumatlandırıb.
Nyus.Az
