Şəkərin Rusiya Federasiyasından ixracına qadağa qoyulur. Qadağa 2024-cü il avqustun 31-dək qüvvədə olacaq. Hələ martın ortalarında Rusiyanın Kənd Təsərrüfatı Nazirliyi 2024-cü il avqustun 31-dək Rusiya Federasiyasından şəkərin ixracını qadağan edən hökumət qətnaməsi layihəsi hazırlayıb. Ölkəmizin şəkər idxal etdiyi əsas ölkələrdən biri də məhz Rusiyadır.
Bəs Rusiya Federasiyasının sözügedən qərarı Azərbaycanın daxili bazarına təsir göstərə bilərmi?
Mövzu ilə bağlı yenisabah.az-a danışan iqtisadçı-ekspert Akif Nəsirli bildirib ki, tələbatı başqa ölkələrdən qarşılamaq mümkündür, ancaq bu çıxş yolu deyil:
"Azərbaycan bir neçə ölkədən şəkər idxal edir. İdxalın bir hissəsi Rusiyadan gəlir, amma Rusiyadan gələn hissə o qədər də böyük deyil. Biz əsasən şəkəri İrandan alırıq. Rusiyadan ixrac olunan şəkər tələbatını başqa ölkələrdən gələn şəkərin idxalını artırmaqla kompensasiya edə bilərik. Amma məsələ burasındadır ki, Azərbaycanın bu sahədə öz yerli tələbatını ödəyə biləcək potensialı var. Sadəcə olaraq, ölkədə cəmi 1 şəkər zavodu var. Son 1-2 ildə ölkəmizdə şəkər çuğunduru istehsalı çoxalsa da, 90-cı illərə nisbətən daha azdır. Hətta o vaxtlar İran bizdən şəkər çuğunduru idxal edirdi. İndi isə əksinədir".
Ekspert ölkəmizdə şəkər çuğundurunun əkilməsinin olduqca əlverişli olduğunu diqqətə çatdırıb.
"Azərbaycanda şəkər çuğunduru adətən Qazax, Tovuz və Gəncə bölgəsində əkilir. Ümumi götürsək, şəkər çuğundurunun əkilməsinə şimal ərazilərində daha çox rast gəlirik. Ötən il ən çox şəkər çuğunduru Tovuz rayonunda istehsal olunub. Yəni şimal rayonlarında bu bitki daha yaxşı əmələ gəlir. Lakin mərkəzi aran və cənub rayonlarında da şəkər çuğunduru əkmək mümkündür".
Nyus.Az
