Yaxın Şərqdə hərbi gərginliyin pik həddə çatdığı bir vaxtda Ağ Evdən mühüm bəyanat gəlib. ABŞ rəsmiləri İranın dünən həyata keçirməyi planlaşdırdığı 800 edam hökmünü dayandırdığını açıqlayıb.
Nyus.Az xəbər verir ki, ABŞ Prezidenti Donald Trampın İrana hərbi zərbə endirib-endirməyəcəyi bütün dünyanın diqqət mərkəzindədir. Ağ Evin mətbuat katibi Karolin Livitt bildirib ki, Tramp administrasiyasının sərt xəbərdarlıqlarından sonra Tehran geri addım atmağa başlayıb.
Ağ Evin sözçüsü bildirib ki, Prezident Tramp etirazçıların öldürülməsinə davam ediləcəyi təqdirdə bunun İran rejimi üçün çox ağır nəticələri olacağını bəyan edib. İrandan Vaşinqtona daxil olan məlumata görə, bu təhdidlərdən sonra dünən icrası nəzərdə tutulan 800 edam qərarı dondurulub. Lakin Livitt vurğulayıb ki, buna baxmayaraq, "bütün hərbi və siyasi variantlar hələ də masadadır" və ABŞ vəziyyəti anbaan izləyir.
Qeyd edək ki, İranda 28 dekabr 2025-ci ildə iqtisadi çətinliklər və milli valyutanın dəyər itirməsi səbəbindən başlayan etirazlar qısa müddətdə ölkəyə yayılıb. 2 615 nəfər ölüb, 18 470 nəfər isə həbs olunub.
Analitiklər qeyd edirlər ki, 800 nəfərin edamının dayandırılması Trampın "maksimum təzyiq" siyasətinin nəticəsidir. Bununla belə, Ağ Ev hərbi müdaxilə planlarının gizli saxlanıldığını və yalnız çox dar bir çevrənin bundan xəbərdar olduğunu bildirib. Hazırda İranda küçə nümayişlərinin qismən sakitləşdiyi müşahidə olunur, lakin iqtisadi böhran və siyasi qeyri-müəyyənlik davam edir.//Milli.Az/
Nyus.Az
