ABŞ Prezidenti Donald Tramp xalqa müraciətində iqtisadi sahədə əldə etdiyi nailiyyətləri sadalamaqla kifayətlənib: o, nə Ukraynadakı, nə də Veneseula ətrafındakı vəziyyətə toxunmayıb, yalnız Qəzzada sülhün əldə olunduğunu qeyd edib.
Nyus.Az xəbər verir ki, o, çıxışına özündən əvvəlki Co Baydenin prezidentlik dövrünü tənqid etməklə başlayıb, hakimiyyətə ikinci gəlişindən bəri ABŞ iqtisadiyyatının çiçəkləndiyini söyləməklə bitirib. Onun sözlərinə görə, prezidentliyi dövründə qiymətlərin endirilməsində əhəmiyyətli irəliləyişlər əldə edilib: "11 ay əvvəl bir qarışıqlığı miras aldım və onu təmizləyirəm. Vəzifəyə başlayanda inflyasiya son 48 ildə ən yüksək idi, bəziləri deyərdi ki, ölkəmizin tarixində ən yüksək idi, onlar qiymətləri əvvəlkindən daha yüksək səviyyəyə qaldırdılar və milyonlarla amerikalı üçün həyatı əlçatmaz etdilər".
Amerika lideri cəmi bir neçə ay ərzində "pisdən yaxşıya doğru getdiyimiz"i bəyan edib: inflyasiya dayandırılıb, əmək haqqı artıb və qiymətlər düşüb: "Bizim rəhbərliyimiz altında qiymətlər sürətlə düşür".
Xüsusilə, o, Şükran günü hinduşkasının qiymətinin keçən illə müqayisədə 33 faiz, yumurtanın qiymətinin isə mart ayından bəri 82 faiz düşdüyünü açıqlayıb.
Tramp ölkə üzrə benzinin orta qiymətinin qallon üçün 2,50 dollar olduğunu bildirib.
ABŞ prezidenti növbəti 12 ay ərzində ABŞ-da 1600 yeni elektrik stansiyasının açılacağını vəd etdi ki, bu da onun sözlərinə görə, "Demokratik inflyasiya fəlakəti" adlandırdığı vəziyyəti əksinə dəyişəcək.
Tramp iqtisadiyyatın artıq xilas edildiyini və yalnız yaxşılaşacağını qeyd edib: "Ölkəmiz çökməyə, tam çökməyə hazır idi. Biz indi dünyanın ən qaynar ölkəsiyik".
Eyni zamanda, ABŞ prezidenti administrasiyasının uğurlarının böyük hissəsini tarif siyasəti ilə əlaqələndirib: "Bu uğurun böyük hissəsi tariflər vasitəsilə əldə edilib - mənim ən sevdiyim söz olan "tariflər", onlar on illərdir digər ölkələr tərəfindən bizə qarşı uğurla istifadə olunur, lakin artıq istifadə edilmir".
O, əlavə edib ki, ölkəyə rekord 18 trilyon dollarlıq investisiya cəlb etməyi bacarıb: "Biz irəliləyiş əldə edirik".
Analitiklərə görə, Trampın xalqa müraciəti onun əhali arasında nüfuzunun sürətlə düşməsindən qaynaqlanan narahatlığının nəticəsidir. Son sorğular Trampa etimadın kəskin düşdüyünü göstərir və o, xalqa son müraciətində sırf iqtisadi məsələləri önə çəkməklə bu prosesdən ciddi narahatlıq keçirdiyini nümayiş etdirir.//Musavat.com//
Nyus.Az
