ABŞ Prezidenti Donald Trampın illik tibbi müayinəsi maraqlı nəticə verib. Həkimləri onun ürək yaşının 65 olduğunu açıqlayıb - bu isə 79 yaşında olan Trampdan 14 il daha gənc deməkdir. Həkimlər onun ümumi sağlamlıq vəziyyətini "fövqəladə dərəcədə yaxşı" kimi qiymətləndiriblər.
Nyus.Az xəbər verir ki, Donald Tramp Merilend ştatında yerləşən Walter Reed Milli Hərbi Tibb Mərkəzində planlı illik sağlamlıq yoxlamasından keçib. Prezident həmçinin beynəlxalq səfərlərə hazırlıq çərçivəsində qrip peyvəndi və COVID-19 xatırlatma vaksinləri də vurub.
Trampın şəxsi həkimi Sean Barbabella müayinənin nəticələrini Ağ Ev Mətbuat Katibi Karoline Leavitt-ə təqdim edərək belə deyib:
"Tramp fövqəladə sağlamlığını qoruyur, güclü ürək-damar sistemi, ağciyər, nevroloji və fiziki performans nümayiş etdirir."
Həkimin sözlərinə görə, elektrokardioqrafiya ilə aparılan ölçümdə Trampın ürək yaşı 65 olaraq təyin edilib. Bu göstərici, kardiyovaskulyar sağlamlığın təsdiqlənmiş bir göstəricisi hesab olunur.
Qeyd edək ki, bir neçə ay əvvəl Tramp əlinin üstündə göyərti və ayağında şiş ilə görüntüləndiyi üçün medianın diqqətini çəkmişdi. Ağ Ev bu görüntülərə aydınlıq gətirərək onun xroniki venoz çatışmazlıq yaşadığını bildirmişdi. Bu xəstəlik zamanı damarlar qanın ürəyə geri pompalanmasını tam yerinə yetirə bilmir və nəticədə bədəndə şiş və qan yığılması baş verir.//Milli.az//
Nyus.Az
