ABŞ Prezidenti Donald Tramp, Kremlin Rusiya-Ukrayna sülh danışıqlarına "ara verildiyini" açıqlamasından sonra sərt bəyanatla çıxış edib. Tramp Rusiya Prezidenti Vladimir Putinə qarşı səbrinin "sürətlə tükəndiyini" bildirib və Moskvanın kompromis göstərməyəcəyi təqdirdə Rusiyaya qarşı ciddi sanksiyaların tətbiq edilə biləcəyini vurğulayıb.
Nyus.Az xəbər verir ki, Fox News-ə müsahibəsində Tramp, Putinin münaqişəni sona çatdırmaqdan imtinasının səbrini sınağa çəkib-çəkmədiyi ilə bağlı suala belə cavab verib:
"Putinə qarşı səbrim tükənmək üzrədir və sürətlə tükənir. Amma unutmayaq ki, tango etmək üçün iki nəfər lazımdır."
Tramp Moskvanın kompromis göstərmədiyi halda sərt sanksiyaların gündəmə gələ biləcəyini bildirib. O, Rusiyanın Ukrayna ilə sülh danışıqlarında konstruktiv mövqe nümayiş etdirməsini istədiyini vurğulayıb.
Tramp həmçinin Rusiya Prezidenti Vladimir Putin ilə Ukrayna Prezidenti Volodimir Zelenski arasında görüş məsələsində ortaq qərar alınmadığını qeyd edib:
"İnanılmazdır. Putin görüşmək istəyəndə Zelenski istəmədi. Zelenski istəyəndə Putin razı olmadı. İndi isə Zelenski istəyir, amma Putin tərəfi sual altındadır."
Kremlin sözçüsü Dmitri Peskov, Trampın üç ildən artıq müddətdə davam edən münaqişəni bitirmək cəhdlərinin nəticəsiz qalması fonunda Rusiya ilə Ukrayna arasında aparılan danışıqlara "ara verildiyini" açıqlayıb.
Peskov jurnalistlərə verdiyi açıqlamada deyib:
"Müzakirə heyətimiz müxtəlif kanallar vasitəsilə əlaqə saxlaya bilir. Lakin indiki mərhələdə prosesə ara verildiyini demək daha düzgün olar. Gözümüzü yumub Ukrayna danışıqlarından ildırım sürəti ilə nəticə gözləmək sadəlövhlük olardı."//Milli.Az//
Nyus.Az
