Azərbaycanda keçirilən növbədənkənar prezident seçkiləri Türkiyə mediasında geniş işıqlandırılıb.
Nyus.Az AZƏRTAC-a istinadən bildirir ki, Türkiyənin "Beyaz Qəzet" media qurumunun "Azərbaycan Prezidenti Əliyev işğaldan azad edilmiş Xankəndidə səs verib" sərlövhəli yazısında Qarabağda 30 ildən sonra ilk dəfə seçki məntəqələrinin qurulduğu vurğulanıb.
Məqalədə bildirilib ki, Azərbaycanın erməni işğalından azad etdiyi rayonlarda təxminən 30 ildən sonra ilk dəfə seçki məntəqələri yaradıb. Qarabağın mədəniyyət paytaxtı Şuşa, həmçinin Xankəndi, Xocalı, Xocavənd, Ağdərə, Ağdam, Cəbrayıl, Füzuli, Zəngilan, Qubadlı, Laçın və Kəlbəcərdə yaradılmış 26 seçki məntəqəsində 23 mindən çox seçici səs verib.
"Son dəqiqə.com" saytı seçkilərlə bağlı yazısını "Azərbaycan Prezidenti İlham Əliyev ailəsi ilə birlikdə Xankəndidə səs verib" sərlövhəsi ilə yayımlayıb.
Azərbaycanda keçirilən seçkilərlə bağlı görülən təhlükəsizlik tədbirlərinə diqqət çəkilən məqalədə, həmçinin deyilir: "Görülən təhlükəsizlik tədbirləri çərçivəsində 125 seçki dairəsində yaradılan məntəqələrdə xüsusi veb-kameralar quraşdırılıb. Səsvermə prosesi yerli vaxtla saat 19:00-da başa çatıb və növbədənkənar seçkinin ilkin nəticələri yaxın vaxtlarda açıqlanacaq. Azərbaycan Mərkəzi Seçki Komissiyası nəticələri 10 gün ərzində Konstitusiya Məhkəməsinə təqdim edəcək və nəticələr təsdiqləndikdən sonra Prezident rəsmən elan olunacaq".
Anadolu Agentliyi seçki ilə bağlı analitik yazı da daxil olmaqla, bir neçə informasiya yayımlayıb. Agentliyin "Azərbaycanın suverenliyinin elanı: Qarabağda seçki məntəqələri qurulur", "Azərbaycanda işğaldan azad edilmiş Füzulidə xalq prezident seçkilərinə maraq göstərir" kimi yazılarında seçkilərdəki seçici fəallığı və işğaldan azad edilən ərazilərdə məntəqələrin qurulması xüsusi vurğulanıb.
Bildirilib ki, Qarabağın ürəyi Şuşada, vaxtilə separatçı ermənilərin "paytaxt"ı hesab edilən Xankəndidə və digər rayonlarda seçicilər səs vermək üçün məntəqələrə axın ediblər.
Yazılarda seçicilərin müsahibələrinə də yer verilib.
Agentlik seçkilərlə bağlı xüsusi infoqrafika da hazırlayıb.
"TRT" də seçkilərlə bağlı bir neçə xəbər yayımlayıb. Yazılarda Prezident İlham Əliyevin Xankəndidə səs verməsi, işğaldan azad edilən ərazilərimizdə həmvətənlərimizin seçkilərdə ruh yüksəkliyi ilə və fəal şəkildə iştirakları xüsusi vurğulanıb.
Xarici ölkələrdə qurulan seçki məntəqələrinə də toxunulan məqalələrdə bildirilib ki, xaricdə yaşayan Azərbaycan vətəndaşları 37 ölkədə yaradılmış 49 seçki məntəqəsində səs veriblər.
"Hürriyyet.com" saytında dərc olunan materialda səsvermənin şəffaf keçdiyinə diqqət çəkilib, seçkiləri 790-ı beynəlxalq olmaqla, ümumilikdə 90 mindən çox müşahidəçinin, 109 beynəlxalq media qurumundan 216 xarici jurnalistin izlədiyi qeyd edilib.
Məqalədə işğaldan azad edilən ərazilərimizdə 30 ildən sonra ilk dəfə seçki məntəqələrinin yaradıldığı və yüksək təhlükəsizlik tədbirlərinin görüldüyü xüsusi vurğulanıb.
"Haber Global"da da növbədənkənar Azərbaycan seçkiləri ilə bağlı informasiyalar yayımlanıb.
Xəbərlərdə Prezident İlham Əliyevin Xankəndidə səs verməsinə, seçkilərin gedişinə, 30 ildən sonra Qarabağda yaradılan seçki məntəqələrinə, seçici fəallığına, müşahidəçilər üçün bütün zəruri şəraitin yaradıldığına diqqət çəkilib.
"Haber7com" saytında dərc olunan "Azərbaycan prezidentini seçir! Əliyev öz səsini verib" sərlövhəli yazıda seçkilərin çoxsaylı beynəlxalq təşkilatlar tərəfindən izləndiyi qeyd edilib. Məqalədə Prezident İlham Əliyevin, birinci xanım Mehriban Əliyevanın və ailə üzvlərinin Xankəndidə səs verdikləri bildirilib.
Yazının "Qarabağda ilk seçki" alt başlığı altında verilən hissəsində Qarabağdakı azərbaycanlıların səsvermə prosesi, onların vətənlərinə qayıtmaları ilə bağlı sevinc hissləri əks olunub.
"Haberler.com" saytında xüsusilə seçicilərin müsahibələri əsasında hazırlanan məqalə "Bu, bizim üçün qürurverici, tarixi gündür", "Gördüyünüz kimi, Azərbaycan xalqı canla-başla səsini verir", "Qarabağın azad edilməsində Türk xalqının böyük dəstəyi oldu" kimi alt başlıqlarla yayımlanıb.
Seçkilərlə bağlı geniş məlumatların verildiyi məqalədə Qarabağda yaradılan məntəqələrdə beynəlxalq müşahidəçilərin çoxluğu xüsusilə diqqətə çatdırılıb.
Nyus.Az
