Bu gün Nyus.Az xəbər portalında Yevlax şəhər sakini və media nümayəndəsi Teymur Rüstəmovun üz-üzə qaldığı problemlə bağlı “Yevlaxda “Zeytun” aptekin sahibi ilə polisin işbirliyi jurnalisti həbsə aparacaq? –PROBLEM” başlıqlı məqalə yayımlamışdıq. Məqalənin yayımlanmasından bir qədər sonra DİN Mətbuat Xidməti məsələ ilə bağlı mövqe bildirdi. Odur ki, adı çəkilən qurumdan çatdırılan mövqeni hər kəsin diqqətinə çatdırırıq.
Qarşı tərəf:
İddialar həqiqəti əks etdirmir, əsassızdır.
Bu barədə DİN Mətbuat Xidmətinindən bildirilib ki, Yevlax Rayon Polis Şöbəsinə fevralın 14-də özünü jurnalist kimi təqdim edən Sənan adlı şəxsin şəhər sakini R.Məmmədova hədə-qorxu gələrək 15.000 manat tələb etməsi barədə müraciət daxil olmuşdur. Polis əməkdaşlarının keçirdikləri əməliyyat tədbirləri nəticəsində hədə-qorxu ilə tələb etmədə şübhəli bilinən rayon sakinləri – “Kanal S.az” internet portalının təsisçisi Sənan Ələkbərov və Teymur Rüstəmov müəyyən edilərək saxlanılmışlar. Araşdırmalarla onların fevralın 16-da Yevlax şəhər sakinləri E.Misirxanovaya və G.Süleymanovaya hədə-qorxu gəlməklə ümumilikdə 6.000 manat tələb etmələri də müəyyən edilib. Faktla əlaqədar Cinayət Məcəlləsinin 182-ci maddəsi (hədə-qorxu ilə tələb etmə) ilə cinayət işi başlanmışdır.
Yevlax Rayon Polis Şöbəsində araşdırma aparılır.
Nyus.Az
