[/center]Güclü külək Sumqayıt və Novxanı ərazilərinə aid bağ massivlərində elektrik enerjisinin kütləvi kəsilməsinə səbəb olub. Çoxsaylı yaşayış evləri və bağ evləri işıqsız qalıb.
Nyus.Az xəbər verir ki, şiddətli külək nəticəsində dam örtüyünün qoparaq elektrik xətlərinin üzərinə düşməsi qəza yaradıb.
Enerji təchizatı qurumunun regional xidmətindən Musavat.com-a verilən məlumata görə, dam örtüyünün metal konstruksiyaları elektrik xətlərini zədələyib. Nəticədə Sumqayıt–Novxanı istiqamətində yerləşən bağ massivlərinin bir sıra hissələrində elektrik enerjisinin verilişi dayanıb.
Hazırda qəza-bərpa briqadaları hadisə yerində çalışır. Elektrik enerjisinin nə vaxt tam bərpa olunacağı isə hələlik məlum deyil.
Lakin problem təkcə bugünkü güclü küləklə bağlı deyil.
Ərazidə yaşayan Musavat.com əməkdaşının verdiyi məlumata görə, Sumqayıt və Novxanı bağlarında elektrik enerjisinin kəsilməsi artıq mütəmadi xarakter alıb. Külək əsəndə, yağış yağanda, hətta isti yay günlərində belə sakinlər saatlarla işıqsız qalırlar.
Sakinlərin müşahidələrinə görə, yayda havaların həddindən artıq isti keçməsi, payız və qış aylarında isə külək və yağıntılar elektrik enerjisinin kəsilməsinə səbəb kimi göstərilir.
Belə çıxır ki, Sumqayıt–Novxanı bağlarında elektrik enerjisinin fasiləsiz verilməsi üçün ideal hava şəraiti lazımdır!
Halbuki elektrik şəbəkəsi məhz müxtəlif hava şəraitində dayanıqlı fəaliyyət göstərmək üçün qurulmalıdır.
Ərazidə köhnəlmiş elektrik naqillərinin yenilənməsinə, xətlərin texniki vəziyyətinin ciddi yoxlanılmasına və infrastrukturun gücləndirilməsinə ehtiyac olduğu bildirilir.
Musavat.com əməkdaşının müşahidələrinə əsasən, əraziyə xidmət göstərən aidiyyəti qurumların bəzi hallarda problemlərə vaxtında və yetərincə reaksiya verməməsi də narazılıq doğurur.
Əsas sual isə budur: niyə hər mövsüm təkrarlanan elektrik kəsintilərinin qarşısını almaq üçün indiyədək köklü tədbirlər görülməyib?
Sakinlər hər dəfə havanın dəyişməsi ilə elektrik enerjisinin kəsiləcəyi narahatlığını yaşamalı deyillər.
Aidiyyəti qurumlar yalnız növbəti qəzanı aradan qaldırmaqla kifayətlənməməli, Sumqayıt–Novxanı bağlarının elektrik təchizatındakı sistemli problemlərin həlli üçün konkret tədbirlər görməlidirlər.
Məsələ ilə bağlı aidiyyəti qurumların mövqeyini də dərc etməyə hazırdır.(Musavat.com)
Nyus.Az

























