Yaponiya hökuməti koronavirusa yoluxduğu güman edilən insanları aşkar etmək məqsədilə smartfonlar üçün əlavədən istifadə etməyi planlaşdırır.

Nyus.Az AZƏRTAC-a istinadən bildirir ki, tətbiqin hazırda Sinqapurda istifadə edilən əlavəyə oxşayacağı bildirilir. Qeyd olunur ki, həmin əlavənin olduğu smartfonun sahibi telefonunda bu tətbiqi istifadə edən digər şəxsə yaxınlaşdıqda həmin insanların hər ikisinin telefonları nömrələri qeydə alaraq kodlaşdırılmış şəkildə yaddaşda saxlayır. Əgər əlavənin sahibinin koronavirusa yoluxduğu məlum olursa, bu zaman hökumət orqanları kodlaşdırılmış məlumatları təhlil edərək həmin şəxsin yaxınlığında olan virus daşıyıcısını tapır.

Bildirilir ki, hazırda yapon şirkətlərindən biri bu əlavənin ona məxsus olacaq yeni variantı üzərində işləyir. Hökumət isə tətbiqin etibarlı olduğunu təyin etmək məqsədilə sınaqlar keçirməyi nəzərdə tutur. Fərdi məlumatların qorunması üçün həmin sistemdən ehtiyatla istifadə olunacağı da bildirilir.

Nyus.Az