Yeni il hər kəsin gözlədiyi bir bayramdır - həm uşaqların, həm də böyüklərin. Bu bayramda hər birimiz xəyallar qurur, hər bir şeyin mümkünsüz olmadığına inanır və ümid edirik. Yeni il xeyir gətirir və nağıl dünyasına qapı açır. Azərbaycan Gimnastika Federasiyası "Tarik Gimmaster və dostlarının sehrli sərgüzəştləri" adlı genişmiqyaslı Yeni il şousunu tamaşaçılara təqdim edərək sehrli və cazibədar dünyaya səyahətə dəvət edib. Şou Bakıdakı Milli Gimnastika Arenasında təqdim edilib.
Nyus.Az Trend-ə istinadən xəbər verir ki, "Tarik Gimmaster və dostlarının sehrli sərgüzəştləri" şousu mürəkkəb akrobatik və gimnastika nömrələri, əla musiqi və maraqlı hekayəni özündə cəmləşdirən parlaq, maraqlı Yeni il tamaşasıdır. Şou "Harry Potter" haqqında romanların motivləri üzərində qurulub.
Yeni ili ən sevilən nağıl personajları - Şaxta baba və Qar qız olmadan təsəvvür etmək mümkün deyil. Onlar tamaşaçıları salamlayaraq, hər kəsi 31 dekabrda qeyd olunan Dünya Azərbaycanlılarının Həmrəylik Günü və qarşıdan gələn Yeni il münasibəti ilə təbrik etdilər.
Tamaşadan əvvəl 24 dekabr Azərbaycan Prezidenti İlham Əliyevin doğum günü olduğu qeyd edilib. Azərbaycan gimnastlarının hər zaman dövlət başçısının diqqət və qayğısını hiss etdikləri vurğulanıb.
Bayram axşamı "Ocaq" İdman Klubunda gimnastika ilə məşğul olan fiziki məhdud imkanlı uşaqların çıxışı ilə başladı. Onların ifasında enerji dolu gimnastika kompozisiyası gurultulu alqışlarla qarşılandı.
Sonra yeni il şousu təqdim edildi. Milli Gimnastika Arenasında tamaşaçılar inanılmaz gözəllikdə gimnastik nömrələrin şahidi oldular. Mürəkkəb gimnastika hərəkətləri, zəngin hekayə xətti, müasir işıqlandırma cihazlarından istifadə, video müşayiəti, dinamik musiqi, canlı səhnə geyimləri fantastik qavrayış effekti yaratdı.
Tamaşaçılar - həm uşaqlar, həm də valideynlər şou qəhrəmanları ilə birlikdə gimnastikanın sehrli dünyasında maraqlı sərgüzəştlərlə qarşı-qarşıya gəldilər. Süjetə görə, tamaşanın əsas personajı olan Tarik Himmasterin həyatı Sehirli Gimnastika Arenasına gəldiyi zaman sehr və texnika möcüzəsinə yiyələnir. Burada Tarik həqiqi dostlar qazanır - Həmidə və Rauf. Birlikdə idman dünyasında inanılmaz, sehrli bir səyahətə çıxırlar, sehrin sirlərini öyrənirlər. Bu yolda onları maraqlı sərgüzəştlər, gimnastikanın müxtəlif növlərində şən sehrli dərslər gözləyir. Ancaq ən əsası, onlar idmanın ən güclü sehrinin dostluq olduğunu başa düşürlər.
Gimnastika alətləri - dəstəli at, paralel qollar, turniklər, dayaq, batut - tamaşada çox maraqlı oynanılıb. Əlbəttə ki, bədii gimnastikanın adi atributları - lent, halqa və top da tamamilə yeni tərzdə təqdim edilib. Şounun yaradıcıları çox maraqlı rekvizitlərdən istifadə ediblər - tamaşa zamanı hətta həqiqi motosiklet də ortaya çıxıb.
Rəngarəng dekorasiya, işıq proyeksiyaları, qəhrəmanların heyrətamiz geyimləri, ardıcıl səhnə nömrələri tamaşaçıları sehr, macəra və gimnastika dolu dünyaya sövq edib.
"Tariq Himmasterin və dostlarının sehrli sərgüzəştləri" şousunun rejissoru və ssenari müəllifi bədii gimnastika üzrə Azərbaycan yığmasının baş məşqçisi Mariana Vasilyevadır. Təqdimatda gimnastikanın müxtəlif növləri üzrə Azərbaycan milli komandalarının gimnastları, məşqçiləri və xoreoqrafları iştirak ediblər.
Yeni il şousunun iştirakçıları sənətkarlıqları ilə hər kəsi heyrətləndiriblər - onlar mürəkkəb gimnastika elementlərini ifa etməklə bərabər eyni zamanda qəhrəmanların obrazlarını canlandırıblar, personajların əhval-ruhiyyələrini və duyğularını bədii şəkildə çatdıra biliblər. Rəqslərin, gimnastika kompozisiyalarının və səhnə əsərlərinin sintezi salonda Yeni il bayramı əhval-ruhiyyəsi yaradıb.
"Tarık Himmasterin və dostlarının Sehrli sərgüzəştləri" adlı möhtəşəm şounu tamaşaçılara təqdim edən Azərbaycan Gimnastika Federasiyası əsl coşqu ilə qarşılanan inanılmaz bayram hədiyyə edib. Şou başa çatsa da, onunla bağlı xatirələr illərlə qalacaq.
Tamaşa publikanın gurultulu alqışları və "bravo!" səsləri ilə qarşılanıb.
Şounun xoreoqrafları Kamil Quliyev və Akif Kərimli jurnalistlərə verdiyi müsahibədə tamaşaçıların canlı marağının onlara təsvir edilməz həzz verdiyini etiraf edərək, vurğulayıblar: "İki aydır ki, bu şouya hazırlaşırıq və şounun tamaşaçılar tərəfindən bu qədər isti qarşılandığından çox məmnunuq. Hər il tamaşaçıları təəccübləndirməyə və sevindirməyə çalışırıq. Şouda yüzə yaxın gimnastla birgə xoreoqraf və məşqçilər də iştirak edib".
Nyus.Az
