İnsanın sevdiyi şəxsləri itirməsi, onlarla vidalaşmaq fürsəti belə tapa bilməməsi ürək dağlayan vəziyyətdir.
Nyus.Az xəbər verir ki, yaponlar bu ağrılı mənzərəni "Kaze no Denwa" adını verdikləri külək telefonu ilə həll etmək istəyirlər.
İçərisində telefonun olduğu bu köşk, Otsuçi şəhərindəki kiçik bir təpənin üzərində yerləşir. Onun gözlərdən bu qədər uzaqda olmasının səbəbi insanların ağrılarını yaşayarkən tək qalması üçündür.
72 yaşlı İtaru Sasaki layihəni 2011-ci ildə baş verən zəlzələ və sunamidən sonra reallaşdırmağa qərar verib. Həmin fəlakətdə yaxınını itirən Sasaki təklifi ilə bağlı bunları deyib: "Düşüncələrimin, içimdə qalan cümlələrin telefon xətti ilə çatdırılması qeyri-mümkün olduğu üçün onları küləklə göndərmək istədim".
Köşk barədə mətbuatda informasiya getdikdən sonra ora kütləvi axın olub. Dünyasını dəyişən yaxınlarına, sevdiklərinə söyləyəcək sözləri olan minlərlə insan telefonla danışmaqla kifayətlənməyib, oradakı qeyd dəftərinə ürək sözlərini də yazıblar.
Sasaki psixoloji məqam haqda bunları deyib: "Bu telefon heç bir yerə bağlı deyil, insanlar sanki qarşılarında onları dinləyən biri varmış kimi danışırlar. Dünyasını dəyişən yaxınlarımıza söyləyə bilmədiyimiz sözlərin yüküylə yaşamaq çox çətin olduğu üçün bu xətt az da olsa, yüngülləşmək imkanı verir". (publika.az)
Nyus.Az
