Rusiyada yaradılan "FaceApp" və digər mobil tətbiqlər potensial əks-kəşfiyyat təhlükəsi yaradır.

Nyus.Az ted.az-a istinadən bildirir ki, bu barədə ABŞ Federal Təhqiqat Bürosunun (FBI) məlumatında qeyd olunub.

FBI amerikalı senator Çak Şumerin müvafiq tapşırığına uyğun olaraq adıçəkilən mobil tətbiqi araşdırmağa başlayıb.

Üzdəyişdirmə tətbiqi kimi məşhurluq tapan "FaceApp" qısa müddət sonra məxfiliklə bağlı narahatlıqlara səbəb olub.

FBI bu məlumatı ABŞ-da xarici texnologiya şirkətlərinin məhsullarının təhükəsizlik üçün risk yarada biləcəyi barədə narahatlıqların artması ərəfəsində yayıb.

Bürodan Ç.Şumerə ünvanlanan məktubunda qeyd olunub ki, "FaceApp" kimi Rusiyada hazırlanmış hər hansı oxşar mobil tətbiq və ya məhsullar potensial əks-kəşfiyyat təhdidi hesab edilir.

FBI istifadəçilərin fotoşəkillərini daha yaşlı və ya gənc görünmələri üçün dəyişdirən tətbiqetmənin xarici siyasi müdaxilə cəhdi olmasına dair hər hansı sübut tapacağı halda hərəkətə keçəcəyini bildirib.

"FaceApp" tətbiqinin yaradıcıları ittihama dərhal cavab verməyiblər.

Mobil tətbiqi Sankt-Peterburqda yerləşən "Wireless Lab" şirkəti hazırlayıb. Şirkətdən bundan əvvəl bildirilmişdi ki, onlar şəkilləri yaddaşda həmişəlik saxlamır və çox sayda məlumat toplamırlar. Yalnız istifadəçi tərəfindən redaktə üçün seçilən şəkilləri yükləyirlər.

Xatırladaq ki, senator Ç.Şumer 2019-cu ilin iyul ayında "FaceApp"ın milli təhlükəsizlik və milyonlarla ABŞ vətəndaşının məxfiliyinə risk yaratmaq narahatlığı ilə bu proqramın araşdırılmasını istəmişdi.

Nyus.Az