"Xiaomi" şirkəti Çində "Əşyalar interneti"nin inkişafına həsr edilən tədbirdə "MIUI 11" istifadəçi interfeysində tətbiq edilən zəlzələlər haqqında xəbərdarlıq xidmətini təqdim edib.

Nyus.Az ictnews.az-a istinadən bildirir ki, zəlzələlər haqqında xəbərdarlıq funksiyası rəsmi dövlət orqanı tərəfindən təqdim edilən informasiya əsasında işləyir. İdarə tərəfindən təhlükəli seysmik aktivlik qeydə alınandan dərhal sonra "Xiaomi" servisi xəbərdarlıq bildirişini qurğunun ekranında göstərir. Xəbərdarlıqla yanaşı, istifadəçiyə yaxınlıqdakı təhlükəsiz yerə təxliyə planı göndərilir.

Rəsmi istehsalçı nümayəndələrinin sözlərinə görə, unikal funksiya şirkət mühəndisləri və Çendu Təbii Fəlakətlərin Təhlükəsinin Azaldılması üzrə Elmi Tədqiqat İnstitutunun ekspertləri ilə birgə hazırlanıb. Sözügedən texnologiya zəlzələlər haqqında xəbərdarlıq üçün əməliyyat sistemi səviyyəsində tətbiq olunan dünyanın ilk "AioT" həlli kimi qələmə verilir.

Hazırda texnologiya yalnız Çin ərazisində yaşayan "Xiaomi" smartfon və televizor istifadəçiləri üçün nəzərdə tutulub. Lakin gələcəkdə funksiyanın digər ölkələrin ərazisində, məsələn, servisin daha aktual olduğu Yaponiyada istifadəyə veriləcəyi gözlənilir.

Nyus.Az