Qadın voleybolçular arasında Avropa çempionatında növbəti oyunlar keçirilib.

Virtualaz.org bildirir ki, C qrupunda mübarizə aparan Azərbaycan milli komandası Estoniya yığması ilə üz-üzə gəlib. Budapeştdəki "Laslo Papp" arenasında baş tutmuş qarşılaşma Azərbaycan millisinin qələbəsi ilə yekunlaşıb - 3:2 (25-20, 18-25, 25-22, 22-25, 15-11).

C qrupunda günə Xorvatiya - Macarıstan matçı ilə yekun vurulub. Bu qrupun oyunlarına ev sahibliyi edən macarıstanlılar meydanı məğlubiyyətlə tərk ediblər – 0:3 (20:25, 23:25, 33:35). Bu qələbədən sonra 2-ci pilləyə yüksələn Xorvatiya millisi 1/8 finala vəsiqəni təmin edib. Bizim üçün önəmli olan odur ki, həmin qələbə sayəsində Azərbaycan yığması da 1/8 finala yüksəlib.

Bununla da C qrupundan növbəti raunda çıxan komandaların sayı üçə çatıb. Hollandiya 1-ci yeri təmin edibsə, Azərbaycanla Xorvatiyanın tutacağı mövqe son oyun günündə bəlli olacaq.

Millimiz Rumıniya ilə oyunda qalib gəlsə 2-ci, məğlub olsa 4-cü olacaq. Xorvatiyanın 2-ci, yoxsa 3-cü olması komandamızın qələbəsindən asılı olacaq. Rumıniya qələbə sayəsində 3-cü olub, millimizi 4-cü yerə sıxışdıra bilər.

Xatırladaq ki, millimiz Avropa çempionatlarında 2005-ci ildə debüt edib. Xorvatiyada təşkil olunan qitə birinciliyində Azərbaycan millisi dördüncü olub. Səkkizinci dəfə Avropa birinciliyində gücünü sınayan yığmamız öncəki çempionatlarda mükafatçılar sırasına düşə bilməyib.

Qadınların yarışında final matçı Türkiyədə, kişilərin mübarizəsində isə həlledici qarşılaşma Fransada təşkil olunacaq.

Onu da xatırladaq ki, iki il əvvəl Azərbaycan və Gürcüstanın birgə ev sahibliyi ilə keçirilən 30-cu Avropa çempionatında qızıl medalları Serbiya voleybolçuları qazanıblar. Sonrakı yerlərdə Hollandiya, Türkiyə və Azərbaycan komandaları qərarlaşıb.

Çempionata sentyabrın 8-də yekun vurulacaq.

Nyus.Az