Nazirlər Kabinetinin "Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri"ndə etdiyi dəyişikliyə əsasən, 2018-ci ilin yanvarın 1-dən istifadə müddəti bir ilə qədər olan minik avtomobillərinin idxalına tətbiq olunan gömrük rüsumu 75 faiz, istifadə müddəti bir ildən artıq olan avtomobillər üçün 71,4 faiz artırılıb. Hazırda avtomobil bazarında qiymətlər necədir?
Avtosfer.az xəbər verir ki, məsələ ilə bağlı Modern.az-a danışan iqtisadçı ekspert Vüqar Bayramlının sözlərinə görə, avtomobil bazarında aparılan monitorinq göstərir ki, sön dövrlərdə xüsusilə də yanvar ayının ortalarından etibarən avtomobillərin qiymətində artım var. “Qiymətlərdə artımların müşahidə olunması birbaşa ölkəyə idxal olunan avtomobillərə tətbiq edilən rüsumların artırılması ilə bağlıdır. Ölkəyə idxal edilən avtomobillərə tətbiq edilən rüsumlar xüsusən də mühərrik gücü yüksək olan avtomobillər üçün artırıldı. Qiymət artımları yanvarın 1-ci yarısından deyil, 2-ci yarısından müşahidə olunmağa başladı. Artımlar yeni avtomobillərlə yanaşı, ikinci əl avtomobillərə də təsir etdi. Yalnız mühərrik həcmi 1500 kubmetrə qədər olan avtomobillərdə qiymətlər stabildir. Hətta rüsumların qaldırılmasından əvvəl ölkəyə gətirilən avtomobillərin qiyməti də artırılıb”.
Ekspert bildirib ki, avtomobillərin qiymətində artımlar olsa belə, alıcılıq qabiliyyəti çox aşağıdır. “Avtomobil alıcılarının sayında kifayət qədər azalma var. Eyni zamanda bankların da avtomobil kreditlərini praktik olaraq dayandırması və şərtlərini ağırlaşdırması avtomobil almaq istəyənlərin sayına ciddi təsir göstərib. Cüzi qiymət artımları olsa da, hələlik kəskin qiymət artımları müşahidə olunmur. Son iki həftədə avtomobil qiymətlərində 4-8 faiz intervalında artımlar qeydə alınıb. Güman olunur ki, fevralın ortalarına doğru artırılmış qiymətlərin stabilləşməsi müşahidə olunacaq”.
V.Bayramlı deyib ki, Azərbaycanda istehsal olunan avtomobillər hələlik ümumi avtomobil istehlakında böyük paya malik deyil.
“Adi müşahidələr nəticəsində müəyyənləşdirmək mümkündür ki, Azərbaycanda çox böyük əksəriyyət idxal olunan avtomobillərdən istifadə edirlər. Yerli avtomobillərə marağı artırmaq üçün Neftçalada İran şirkəti ilə birlikdə ildə 1000 avtomobilin istehsal olunması nəzərdə tutulub. Bunun 7000-i daxili istehlak üçün nəzərdə tutulub. Təbii ki, bu belə layihələrin atırılmasını stimullaşdıracaq”.
