Aysel Əlizadə: “Bu saytda yaxşı yazılar oxuyacaq, dincələcəksiniz”
“Yaxşı yazı oxumaq, fərqli şeylər görmək istəyən, bayağılığı tənqid edənlər üçün keyfiyyətli iş təqdim etməyə çalışırıq. Mövzular təkcə qadın-kişi münasibətləri, feminizm haqqında deyil. İnsanların dəyər bildikləri mövzulara toxunmağa çalışırıq. Saytımızdan nəsə bilgi almalarını, rahatlıq tapmalarını, dincəlmələrini istəyirik. Keyfiyyət önəmlidi. Bu kriteriyaları nəzərə almışıq”. Bunu musavat.com-a yeni fəaliyyətə başlamış qadınkimi.com saytının rəhbəri Aysel Əlizadə deyib.
A.Əlizadənin sözlərinə görə, sayt maraqla qarşılanıb:
-Belə reaksiya gözləmirdim. Əlbəttə, bu hələ ilk addımdı. Proqnoz vermək çətindi. Sonrası necə olacaq, onu hələ bilmirik. İlkin reaksiyaya görə yazılar bəyənilib. Ən çox dizayn diqqət çəkib. Dizaynerimiz Günel Dənizin adını xüsusi vurğulamaq istəyirəm. Saytın vizual tərtibatçısıdır. Saytı öz balası kimi, demək olar, doğub. Günel xanım mənim oxucum olub. Bir gün gecənin bir aləmi yuxum ərşə çəkildi. Girdim instagrama. Gələn məktublara baxdım. Gördüm, çox həyəcanlı bir məktub gəlib. Çox sentimental, duyğusal. Elə yazmışdı ki, heyrət etdim. Dərhal cavab yazdım. Oxucularıma cavab yazmağa çalışıram. Sonra kitab təqdimatıma gəldi. Zamanla dostlaşdıq. Saytın hazırlanması ilə isə Monitor - pro şirkətinə aiddi.
-İdeya haradan gəldi? Niyə məhz feminizm saytı?
-Feminizm həyatımda çoxdan var. Balaca qız olandan, feminizm haqda bilməyəndən belə. Kitablarım da konseptual feminizmə həsr olunub. Şeirlər kitabım, romanım və s. gender bərabərliyinə hesablanıb. İnsan çox önəmli faktordur. Hər şey insandan sonra gəlir. Sayt yalnız qadın auditoriyasına hesablanmayıb. Hər kəsə hesablanıb. Qadınkimi.com hər kəs üçündür. Hər kəs rahatlıqla özünə, cinsinə, həyat tərzinə uyğun yazılar tapa bilər. Feminizm Azərbaycanda yanlış anlaşılır. Elə bilirlər, kişi düşmənçiliyidir. Feminizmdə düşmənçilik anlayışı yoxdur. Əksinə, ədalət var, humanizm var. Feminizm qadının özəlliyini vurğulamır. Feminizm deyir ki, biz hamımız insanıq və bir cinsi digərindən hüquqsuz saymaq cinayətdi. Feminizm bu gün dünyada çox aktual cərəyandır. Hər sahədə rast gəlmək olur. Hətta qadın hüquqlarını aşıb bütünlükdə bərabərliyi müdafiə edir. Məşhurlar, yazarlar, siyasət adamlarının içində kişili, qadınlı feministlər saysızdı. Bu termini ilk dəfə fransız filosofu Şarl Furye işlədib. Biz bu adla cəmiyyətdəki problemə diqqət çəkib, ona bir az da ironik yanaşmışıq. Bu günəcən bir insanı təhqir edəndə ona “qadın kimisən, arvad kimisən” deyiblər. “Kişi kimi” öygü, “qadın kimi” aşağılama sayılıb. Bu mental stereotipləri qırmadan cəmiyyətdə nəsə irəliləyiş etmək mümkün deyil. Biz hamımız bu cəmiyyətdə insane olmasaq heç nə alınmayacaq. Alınsa da çox çətin.
-Qadınların özlərinin rolu nə qədərdi bu məsələdə?
-Qadınların diskriminasiyada günahları az deyil. Öz oğluna “qız kimi ağlama, qız kimi filan iş görmə, filan oyuncaqla oynama” deyən analar artıq uşaqlıqdan kişidə travma yaradırlar. Kompleksə salırlar. Halbuki bütün fakt və göstəricilərə görə ən uğurlu kişilər qadın dostları çox olanlardı. Uşağa “qorxaq olma, cəsur ol” demək ayrı şeydi, “ qız kimi olma” demək ayrı. Bu “qız kimi” nin əziyyətini bütün cəmiyyət çəkir. Biz illər boyu elə bilmişik adamın oğlu olursa bu üstünlükdü. Qızı olursa bu artıq qüsurdu. Təsəvvür edə bilirsiz? Dəhşətli, faciəvi düşüncəylə yaşamışıq. Övlad övladdı axı. Eyni zamanda da kütləvi şəkildə belə bir deyimi var toplumun: “Adama qalan qızdı”. O düşüncən nədi, bu dediyin nə? İnkar inkar dalınca…
Saytın gələcək planlarına gəlincə, Aysel Əlizadə oxucularını intizarda saxlayır. Deyir, gələcək planlar ideyadır. İdeyaları da deməzlər, əməl edərlər.
Biz də musavat.com adından başda Aysel Əlizadə olmaqla qadınkimi.com-un kollektivini təbrik edir, onlara yaradıcılıq uğurları arzulayırıq!
Ləman MUSTAFAQIZI,
Musavat.com
