Allah Təala bəzi insanlara bu tofiqi vermişdir ki, belə desinlər: "Allahım! De ki, mən nə yeyim və nə qədər yeyim?". Bu insanlar Allaha təslim olmuşlardır ki, ancaq Onun dediklərini yeyər və ona təslim olarlar.
"Ey Bizim elçilərimiz! (Bəşəriyyətə öyrətmək məqsədi ilə dünyada olan) bütün (yemək, içmək, geyim, hava, bitki və digər şeylərin) paklar(ın)dan bəhrələnin və yaxşı işlər görün ki, Mən etdiklərinizin hamısını bilirəm". ("Muminun" 51).
Hədislərin bir çoxunda halal yeməyə və onun insan üzərində qoyduğu təsirlərə işarə edilmişdir. Hədislərin birində oxuyuruq ki, bir nəfər əziz Peyğəmbərin (s) hüzuruna gəlir və deyir: "İstəyirəm ki, duam yerinə yetsin". Həzrət buyurur: "Yeməyini pak et və mədənə haram yemək daxil etmə".
Saleh əməlimizi haram tikə yeməklə yandırmayaq. Həzrət Peyğəmbər (s) bu haqda buyurur: "Qiyamət günü elə dəstə olacaqdır ki, Məkkə dağları qədər həsənələrinin olmasına baxmayaraq, əmr olunacaqdır ki, onları alova tərəf aparsınlar". Soruşurlar: "Ya Rəsulallah (s), namaz qılan idilər?" Buyurdu: "Bəli, namaz qılırdılar və oruc tuturdular. Gecənin bir hissəsini isə ibadət edirdilər. Ancaq o zaman ki, dünyadan bir şey onlara çatırdı, halal və harama riayət etmirdilər".
Halal tikə qəlbi nurani edər, dualar qəbul olar və Allah onu bağışlayar. Haram tikə isə günahı artırar.
İmam Əli (ə) buyurur: "O kəsin ki, yeyəcəyi az olar, fikir və düşüncəsi pak olar". Bu hədisdən görmək olur ki, insan yeməyi hər nə qədər az yesə, beyni daha yaxşı işləyər və daha yaxşı təfəkkür edər.
"Sizə verdiyimiz pak (maddi və mənəvi) ruzilərdən bəhrələnin və həmin istifadədə (şəriət və ağılın buyurduğu) həddi aşmayın ki, (əgər aşsanız) sizə Mənim qəzəbim nazil olacaqdır. Mənim qəzəbim kimə nazil olubsa, o mütləq həlakət burulğanına düşmüşdür". ("Taha" 81).
Allah yemək yeyən zaman ifrat etməyi bəyənmir və bunu kafirlərin, heyvanların sifətlərindən biri kimi tanıdır. Bu cür insanlara Allahın sözü təsir etməz, bu cür insanlar tarix boyu Həzrət Peyğəmbərə (s) itaət etməmişdilər.
İmam Hüseyn (ə) Aşura günü insanlara o qədər söz dedi və onları düz yola hidayət etmək istədi, ancaq onlar qulaq asmadılar və Həzrət (ə) buyurdu: "Necə ümidim olsun ki, moizəm sizin qəlbinizə təsir qoyacaq, halbuki qarınlarınız haram malla dolmuşdur".
İnsanlar yemək yeyən zaman iki dəstəyə bölünürlər: birinci dəstə dördayaqlılar kimi yeyər və içərlər. İkinci dəstə isə yeyər və içərlər, ancaq yeyəcəklərinin hesabını çəkərlər. Bəzən ağılları deyər ki, bunu ye və onu yemə. Bəzən həkimləri deyər ki, bunu ye və onu yemə. Bəzən bəzi yeməklərdən çəkinərlər. Bu dəstə yeyəcəklərində Allahın buyurduqlarına əməl edərlər. Nə yesin və nə qədər yesin. Bu, İslamın buyurduğu dəstədir.
Ona görə də yediyimiz yeməklərin ləzzətinə deyil, onların halal olub-olmamasına diqqət etsək, və nə qədər yeməli olduğumuza nəzər salsaq, bizim üçün həm bu dünyada və həm də axirətdə daha faydalı olar.
Milli.Az
