Milli.Az jurnalist İntiqam Valehoğlunun müəllif layihəsi olan "Həftəbecər"i (189-cu say) təqdim edir.
Əslində, bu həftə o qədər xoş hisslər yaşamışam ki, kiminsə xətrinə dəyməkdən qorxuram. Hansı hisslərdən söhbət gedir? Bu il oğlum Yusuf məktəbli oldu. Mən də həm Yusufun, həm də özümün adından birinci sinifə gedən bütün övladları və onların valideynlərini təbrik edirəm. Övladı olmayanlara isə tezliklə bu sevinci dadmağı arzulayıram. İndi də keçək mövzulara.
Tacir Şahmalıoğlunun anasının yaşadığı mənzildən çıxarılmasından xəbərdar idiniz. Guya məsələ həllini tapmışdı. Amma sonradan bəlli oldu ki, belə deyil. Xülasə, Tacirin dayısı Nurəddin kişi mətbuata bu barədə açıqlama verib. Deyib ki, Tacirin Bakıda üç mənzili ola-ola, anası niyə kiminsə evində yaşamalıdır? Yeri gəlmişkən, Nurəddin kişi bir dəfə də canlı efirdə Tacirlə bağlı xoşagəlməz ifadələr işlətmişdi. İndi müğənninin anası Südabə nənənin dərdi qalıb bir kənarda, hamı Nurəddin kişidən danışır. İnsaf naminə deyək ki, oxşar fikirləri sosial şəbəkədə də bir neçə nəfər yazmışdı və məsələnin dərinliyinə gedəndə həmin insanlara haqq qazandırmamaq mümkün deyil. İntəhası, bu dayının Tacirə verib ala bilmədiyi nədir, bax onu bilmirəm.
Ötən həftə sosial şəbəkələrdə və saytlarda müzakirə olunan məsələlərdən biri də mərhum sənətkar Yaşar Nurinin ölümü ilə bağlı idi. Guya xalq artistinə sui-qəsd olubmuş. Xanımı ilə şəxsən danışmışam və dedikləri bu oldu ki, yazılanlar həqiqəti əks etdirmir. Sənətkarın əsl vəfat səbəbi ağciyərdə nəfəs çatışmazlığıdır.
Əvvəl müğənnilər öz həmkarlarıyla qırğın-davaya çıxırdılar. İndi işə bir az yenilik qatıblar. Bu dəfə qarmon ifaçısı Gülbahar Şükürlü ilə müğənni Mənzurə Musayeva "atışıb". Gülbahar Şükürlü məclislərin birində Mənzurənin salam vermədən keçdiyini deyib. Mənzurə də cavab verib ki, Gülbahar getsin qarmonunu çalsın. Arada nə baş verdiyindən xəbərsizəm. Amma "getsin qarmonunu çalsın" ifadəsi tamamilə yanlış və qeyri-etikdir. Qarmon çalmaq nə vaxtdan ayıb iş olub ki? Bu ölkənin Aftandil İsrafilov kimi qarmon ustadı var. Hansı ki elə indinin özündə də, otuz il əvvəl də ən məşhur müğənnilərdən az tanınmayıb, az sevilməyib. Əksinə çoxlarından daha artıq sevilib xalq arasında. Ümumiyyətlə, peşəsinə görə kiməsə lağ eləmək, kinayəli atmacalarla nəyisə sübut etməyə çalışmaq kənardan çox eybəcər görünür. Mənzurə ilə hansısa klarnet ifaçısının sözü çəp gəlsəydi, onda necə cavab verəcəkdi? Bəs onda Vəli Qədimov, Əşrəf Əşrəfzadə?..
Aktrisa Pərvin Abıyeva Dubaya gedib, bikinidə fotolar çəkdirib. Bütün saytlar da həmin fotoları xəbərə çeviriblər. Saytlar bir yana, sosial şəbəkələrdə tənqidin biri bir qəpiyədir bu fotoya görə. Ay balam, bəlkə adam iş dalınca gedib, niyə ağzınıza gələni yazırsız? Dubaya iş dalınca getmək olmaz ki?
Rəqsanənin "Instagram" səhifəsi oğurlanıb. Əgər həmin şəxs bu yazını oxuyursa, ona səslənirəm. Əziz dost, xahiş edirəm, xalqın böyük sənətkarının, məşhur müğənnisinin səhifəsini qaytar özünə. Onsuz da sən nə qədər çalışsan da, Rəqsanə ola bilməyəcəksən. Əgər ola bilməyəcəksənsə, neyniyirsən o səhifəni? Yenə hərdən yarıçılpaq fotolar paylaşıb camaatı feyziyab eləyir.
Könül Kərimova oğlunu ali məktəbə düzəltmək istəyirmiş. Buna görə Məlahət adlı qadına 32 min pul verib. Təsəvvür edirsiniz? Qadın da deyilənlərə görə pulu "atıb". O gün "Facebook" profilimdə Zəhra adlı uşağın fotosunu paylaşmışdım. Cəmi bir yaş səkkiz aylıq körpə ürək çatışmazlığından əziyyət çəkir və tam müalicəsi üçün on altı min manat pul lazımdır. Yəni, Könülün oğlunun savadsız olması üçün ödədiyi məbləğə iki Zəhranın həyatını qurtarmaq olar. Bunu elə-belə xatırlatdım. Əgər istəsə həmin ailənin ünvanını və koordinatlarını verə bilərəm.
Hansısa saytda məşhur xanımların plastik əməliyyatdan əvvəl çəkdirdikləri fotolar paylaşılıb. Fikir verdim, on əməliyyat doqquzu burunla bağlıdır. Təklif edirəm ki, plastik cərrahların yanında kirvə ştatı ayrılsın. Həmin kirvələr qadınlar burunlarını KƏSDİRMƏYƏ girməzdən öncə onlara ürək-dirək versinlər. Lap elə hər kəs özü ilə öz "kirvəsini" də gətirə bilər. Burun "kirvəsi". Necə təklifdir?
Milli.Az
