Bakıda hündürmərtəbəli binalarda ən çox satılan mənzillər əsasən orta mərtəbələrdə yerləşənlərdir. Əmlak bazarında 4-9-cu və xüsusilə 5-12-ci mərtəbələr alıcılar tərəfindən daha çox seçilir.
Nyus.Az-ın araşdırmasına görə bunun əsas səbəbi həmin mərtəbələrin həm rahat, həm də təhlükəsiz hesab olunmasıdır. Lift problemi yarananda çox yüksək mərtəbə olmaması üstünlük sayılır, eyni zamanda bu mərtəbələrdə külək və istilik problemi də daha az hiss olunur. Ailəli alıcılar və ipoteka ilə mənzil alanlar daha çox orta mərtəbələrə üstünlük verirlər.
2026-cı ildə Bakıda yeni tikililərdə orta seqment üzrə qiymətlər rayona və mərtəbəyə görə dəyişir. Yasamal rayonunda orta mərtəbələrdə mənzillərin qiyməti təxminən 2800-4200 AZN/m² arasında dəyişir. Nərimanovda bu göstərici 3200-5500 AZN/m², Xətaidə isə 2600-4500 AZN/m² təşkil edir. Ağ Şəhərdə qiymətlər daha yüksəkdir və orta mərtəbələrdə 5000-9000 AZN/m² arasında dəyişə bilir. Binəqədidə isə qiymətlər nisbətən aşağıdır və əsasən 1800-3000 AZN/m² civarında olur.
Premium və elit yaşayış komplekslərində vəziyyət bir qədər fərqlidir. Belə binalarda 12-20-ci mərtəbələr daha bahalı və prestijli hesab olunur. Şəhər və dəniz mənzərəsi olan mənzillər xüsusilə yüksək qiymətə satılır. Ağ Şəhər, Port Baku ətrafı və dənizkənarı ərazilərdə yüksək mərtəbələrdə yerləşən panoramalı mənzillərin qiyməti orta mərtəbələrlə müqayisədə 15-30 faiz daha baha ola bilir.
Ən az tələb olan mərtəbələr isə birinci və sonuncu mərtəbələr sayılır. Birinci mərtəbələrdə səs-küy, rütubət və təhlükəsizlik problemləri alıcıları narahat edir. Sonuncu mərtəbələrdə isə dam problemi və yay aylarında istilik riski səbəbindən tələbat zəif olur. Buna görə də bu mərtəbələrdə yerləşən mənzillər adətən orta mərtəbələrlə müqayisədə 10-20 faiz daha ucuz satılır.
Ümumilikdə, Bakıda investisiya və sürətli satış baxımından ən əlverişli variant metroya yaxın ərazilərdə yerləşən, 2 otaqlı, 70-110 kvadratmetr sahəsi olan və 6-10-cu mərtəbələrdə yerləşən mənzillər hesab olunur. Bu tip mənzillər həm kirayə, həm də satış bazarında daha likvid sayılır.(Milli.az)
Nyus.Az
