ABŞ prezidenti Ukrayna münaqişəsini tezliklə həll edəcəyini açıqladı – təklif Moskvaya təqdim olunacaq
Ukrayna müharibəsinin nizamlanması ilə bağlı ABŞ-ın hazırladığı təklif barədə məlumat artıq Rusiya mediasına da sızıb. Reuters-in yazdığına görə, Vaşinqton sənədi yaxın həftələrdə razılaşdıraraq Rusiyaya təqdim etməyi planlaşdırır.
Nyus.Az bildirir ki, ABŞ, Ukrayna və Avropa nümayəndələri cümə günü Mayamidə müharibənin dayandırılması ilə bağlı vahid təklif üzərində danışıblar. Görüş təxminən altı saat davam edib. Məqsəd qış başlamazdan əvvəl danışıqlarda irəliləyişə nail olmaq üçün Moskvanın müzakirəsinə təqdim ediləcək sənəd hazırlamaqdır.
ABŞ prezidentinin xüsusi nümayəndəsi Stiven Uitkoff bildirib ki, görüşdə münaqişənin qışdan əvvəl həlli imkanları müzakirə olunub.
ABŞ prezidenti Donald Tramp da Nyu-York ştatının Sirakuza şəhərində tərəfdarları qarşısında çıxış edərkən Ukrayna müharibəsini tezliklə həll edəcəyini deyib. O, İranla münaqişənin və Rusiya-Ukrayna müharibəsinin nizamlanmasından danışaraq bildirib:
“Daha iki münaqişəni — İranla olanı və Rusiya ilə Ukrayna arasındakı müharibəni — tezliklə həll edəcəyəm, yaxud qalib gələcəyəm. Rusiya və Ukrayna məsələsini yoluna qoyacağıq və bu, tez baş verəcək”.
Kremlin rəsmi nümayəndəsi Dmitri Peskov isə ABŞ nümayəndələrinin Ukrayna tərəfi ilə keçirilən görüşün nəticələrini təqdim etmək istədikləri halda Moskvada qəbul olunacaqlarını bildirib. (Musavat.com)
Nyus.Az
