Suraxanıda gecə tikinti xaosu - "Ballı" Marketin sahibi daha bir qanunsuz tikinti aparır
Bakının Suraxanı rayonunun Əmircan qəsəbəsi Malik Mustafayev küçəsi - 18/47 ünvanında gecə saatlarında aparılan tikinti işləri sakinlərin narazılığına səbəb olub.
Sakinlərin sözlərinə görə, “Ballı Market”ə yaxın ərazidə tikinti işləri əsasən axşam və gecə saatlarında həyata keçirilir. Onlar ərazidə obyektə əlavə artırma işləri həyata keçirirlər.
Ehtimal ki, tikinti işlərinin gecə saatlarında aparılması diqqətdən yayınmaq məqsədi daşıyır. Gecə yarısınadək davam edən tikinti işlərindən yaranan səs-küy yaxınlıqda yaşayan insanların istirahətinə mane olur.
Məlumata görə, sakinlər tikinti ilə bağlı Suraxanı Rayon İcra Hakimiyyətinə müraciət ediblər. Onlar ərazidə aparılan işlərin qanuniliyinin araşdırılmasını istəyirlər. Sakinlər həmçinin Suraxanı Rayon İcra Hakimiyyətinin başçısı Adil Əliyevin məsələdən xəbərdar olub-olmadığını və tikinti ilə bağlı hansı tədbirlərin görüləcəyini soruşurlar.
Hələlik sakinlərin müraciətinə cavab verilməyib.
Bizimesr.media-nın əldə etdiyi məlumata görə, ərazidə inşa edilən obyektin “Ballı Market” üçün anbar kimi nəzərdə tutulduğu bildirilir.
Qeyd edək ki, “Ballı” marketlər şəbəkəsi iş adamı Elman Əsədovundur. Suraxanı rayonunun Əmircan qəsəbəsində Elman Əsədova məxsus evə 2023-cü ildə silahlı basqın edilməsi barədə məlumat yayılmışdı.
Həmçinin Suraxanı rayonunda Elman Əsədova aid (Elçin) “Nəqqaş” şadlıq sarayı fəaliyyət göstərir. Mərhələli şəkildə hər il "Ballı" marketin ərazisi genişləndirilir və böyüyür. Tikinti işlərinin qanuniliyi, obyektin təyinatı və tikintiyə icazənin olub-olmaması ilə bağlı aidiyyəti qurumların mövqeyini dərc etməyə hazırıq.
Qarşı tərəfin mövqeyini dərc etməyə hazırıq.
Nyus.Az
