25 avqust 2026-cı il tarixində redaksiyamız Səhiyyə Nazirliyinə 10/375 nömrəli məktubla “Kəpəz” Hospitalda əməliyyat blokunun sanitariya-epidemioloji vəziyyəti, havalandırma sistemi və plastik cərrahiyyə fəaliyyəti ilə bağlı rəsmi sorğu göndərib. Sorğuda konkret suallar ünvanlamışdıq: əməliyyat blokunda sonuncu yoxlama nə vaxt keçirilib, havalandırma və ventilyasiya sistemi normativ tələblərə cavab verirmi, bununla bağlı yoxlama aktı varmı, əməliyyat otaqlarının texniki göstəriciləri 37 nömrəli əmrin tələblərinə uyğundurmu?
Bundan başqa, Səhiyyə Nazirliyinin 17 aprel 2025-ci ildə yayımladığı plastik cərrahlar siyahısında adı olmayan Seymur Məmmədovun “Kəpəz” Hospitalda plastik və estetik əməliyyatlar həyata keçirməsi barədə Nazirliyin məlumatının olub-olmadığını soruşmuşduq.
Həmçinin 7 avqust 2026-cı ildə Almaniya vətəndaşı Tulin Turpun hospitalda plastik əməliyyatdan sonra vəfat etməsi ilə bağlı Səhiyyə Nazirliyi və tabeli qurumlar tərəfindən araşdırma aparılıb-aparılmadığını öyrənmək istəmişdik. Mediatvaz.com xəbər verir ki, Nazirliyin cavabı isə əsasən Cinayət-Prosessual Məcəllənin 201.1-ci maddəsinə istinadla “istintaq sirrinin yayılmasının qadağan olması”ndan ibarət olub. Lakin burada əsas sual yaranır: biz istintaq sirrini təşkil edən məlumatları istəməmişdik. Soruşduğumuz məsələlər “Kəpəz” Hospitalda sanitariya nəzarəti, əməliyyat blokunun texniki vəziyyəti, plastik cərrahiyyə fəaliyyətinin qanuniliyi və Nazirliyin bu məsələlərdən xəbərdar olub-olmaması ilə bağlı idi.Bu sualların heç birinə konkret cavab verilməyib.Məsələn, havalandırma sisteminin normativlərə uyğun olub-olmadığı istintaq sirridirmi? Nazirliyin plastik cərrahlar siyahısında adı olmayan şəxsin bu fəaliyyəti qanunidirmi? Bu məsələlər üzrə dövlət qurumunun mövqeyi niyə bildirilmir?Nazirliyin 37 nömrəli əmrin tələblərinə “Kəpəz” Hospitalda əməl edilməsi,Seymur Məmmədovun plastik cərrah kimi fəaliyyət göstərməsi ilə bağlı Nazirliyin mövqeyi nədir? Ümumi şəkildə “istintaq sirridir” cavabı isə sorğuda qoyulan sualların heç birinə cavab vermir.İctimaiyyətin sualı sadədir: Səhiyyə Nazirliyi konkret suallara niyə konkret cavab vermir (Mediatvaz.com)
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!
Nyus.Az
