Abşeronda "Şəhərsalma və Memarlıq İli" çərçivəsində silsilə tədbirlər düzənlənməkdə ikən rayonun inzibati mərkəzi sayılan Xırdalan şəhərinin M.Hüseyn küçəsi, 5 ünvanında qanunsuz tikinti işləri həyata keçirilir. Həmin ünvanda əvvəl çoxsaylı yaşıl ağaclar vardı. Görünür, məhz tikintini həyata keçirən şəxs tərəfindən ağaclar kökündən çıxarılaraq məhv edilib.
Maraqlı və qəribə olan bilirsiz nədir?: Bu sayaq özbaşına tikintilər aparılanda əlaqədar nəzarətedici qurumların hamısı birdən göz yumur. Əgər qanunsuz iş başlayıbsa, beşikdə boğulmayıbsa, yarıya qədər davam etdirilibsə, mütləq başa çatdırılır. Heç cür olmur ki, məsələn, Rayon İcra Hakimiyyəti (RİH), Şəhərsalma və Arxitektura Komitəsi qanunsuzluğa rəvac veribsə, Fövqəladə Hallar Nazirliyinin (FHN) müvafiq strukturu, yaxud, Ekologiya və Təbii Sərvətlər Nazirliyinin (ETSN) ərazi idarəsi həmin özbaşınalığa mane olsun. Sanki bu qurumların hərəkətləri kimi hərəkətsizlikləri də razılaşdırılmış olur.
Sumqayıt Regional Ekologiya və Təbii Sərvətlər İdarəsinin rəisi Asif Məcidov Xırdalanda həyata keçirilən “yaşıl soyqırıma” göz yumur. İctimaiyyət bilir ki, Asif Məcidov sabiq nazir Muxtar Babayevin favorit kadrlarından idi və necə oldusa, gözləntilərin əksinə olaraq vəzifəsindən qovulmadı. Görünür, onun gözüyumulu iş prinsipi hələ də kimlərəsə sərf eləyir. Abşeron RİH-nin baş memarı Kənan Babayev vəzifəyə gələndən bəri isə rayonda şəhərsalma Banqladeş nümunəsini xatırladır.
Mövzuya qayıdacağıq.
Nisa Şirvanlı
Nyus.Az
