Abşeron rayonu, Masazır qəsəbəsi, Əsəd Həsənov küçəsində aparılan yeni tikinti işləri yerli sakinlərin kəskin narazılığına səbəb olub.
Ərazidə yaşayan sakinlərin verdiyi məlumata görə, tikinti işləri əsasən gecə saatlarında, həftəsonları və qeyri-iş günlərində həyata keçirilir. Sakinlər bildirirlər ki, tikintidə istifadə olunan ağırtonnajlı texnikanın yaratdığı kəskin səs-küy gecə saatlarında insanların istirahətini pozur.
Bundan əlavə, sakinlərin əsas şikayətlərindən biri də binalararası qanuni məsafə qaydalarının (tikinti normalarının) gözlənilməməsidir.
Qanunsuz tikinti özbaşınalığı?
Ərazinin geniş miqyasda hasarlanması və ağır texnikanın cəlb olunması tikintinin iri həcmli olduğunu göstərir. Sakinlər iddia edirlər ki, aparılan işlərlə bağlı hər hansı rəsmi icazə sənədi və ya məlumat lövhəsi yoxdur.
Sakinlərin sözlərinə görə, belə genişmiqyaslı işlərin yerli icra strukturlarının xəbəri olmadan aparılması mümkün deyil. Bu da tikintinin hansı şərtlərlə və kimin icazəsi ilə həyata keçirildiyi sualını doğurur.
Məsələ ilə bağlı Abşeron Rayon İcra Hakimiyyətindən və icra başçısı Abdin Fərzəliyevdən tikintinin hansı hüquqi əsaslarla aparıldığına dair hələ ki, heç bir rəsmi açıqlama verilməyib.
Movzu diqqətimizdədir.
Nyus.Az
