Abşeron rayonunun Masazır qəsəbəsində yerləşən "Qurtuluş-93" yaşayış kompleksində aparılan tikinti ilə bağlı redaksiyamızın Abşeron Rayon İcra Hakimiyyətinə ünvanladığı rəsmi jurnalist sorğusuna cavab verilib. Lakin təqdim olunan cavab ilə ərazidən daxil olan son videogörüntülər arasında ciddi ziddiyyət yaranıb.
Nyus.Az xəbər verir ki,İcra hakimiyyəti rəsmi məktubunda açıq şəkildə etiraf edir ki, kompleksdə bina 68 ünvanında Fərid adlı şəxs tərəfindən və bina 19B ünvanlarında naməlum şəxs tərəfindən heç bir mülkiyyət və icazə sənədi təqdim olunmadan birinci mərtəbə və zirzəmi hissəsində tikinti işləri aparılıb, torpaq qatı çıxarılıb, binanın ön fasadı sökülərək dəyişdirilib. Daha sonra isə bildirilir ki, həmin tikinti işləri dayandırılıb, tikinti sahiblərinə xəbərdarlıq edilib və ərazi nəzarətə götürülüb.Bəs əgər tikinti dayandırılıbsa, redaksiyamıza bu gün daxil olan videogörüntülərdə niyə həmin ərazidə tikinti işləri fasiləsiz davam edir? Əgər icra hakimiyyəti özü bu işləri qanunsuz hesab edirsə, həmin qanunsuzluğun davam etməsinə kim şərait yaradır? Nəzarətə götürüldüyü deyilən obyektlərdə işlərin açıq şəkildə davam etməsi dövlət qurumunun verdiyi cavabın praktikada öz təsdiqini tapmadığını göstərmir? Burada artıq söhbət təkcə qanunsuz tikintidən getmir. Söhbət dövlət qurumunun rəsmi mövqeyi ilə faktiki vəziyyət arasındakı uçurumdan gedir. Bir tərəfdən "tikinti dayandırılıb" deyilir, digər tərəfdən isə görüntülər işlərin davam etdiyini göstərir. Bu isə haqlı olaraq belə bir sual doğurur: verilən cavab real vəziyyəti əks etdirir, yoxsa sadəcə kağız üzərində hazırlanmış formal bir hesabatdır?
Əgər qanunsuz tikinti həqiqətən dayandırılıbsa, hazırda aparılan işlər nədir? Yox əgər işlər davam edirsə, onda Abşeron Rayon İcra Hakimiyyətinin rəsmi cavabı hansı əsaslarla hazırlanıb? Dövlət orqanının özünün qanunsuz hesab etdiyi tikintinin davam etməsi nəzarət mexanizmlərinin işləmədiyini, yaxud tətbiq olunan tədbirlərin formal xarakter daşıdığını düşündürür.Redaksiyamız məsələni diqqətdə saxlayır və ərazidən daxil olan yeni faktları ictimaiyyətə təqdim etməyə davam edəcək. Aidiyyəti dövlət qurumlarını yaranmış ziddiyyətə aydınlıq gətirməyə, qanunsuz olduğu rəsmi şəkildə etiraf edilən tikinti işlərinin niyə hələ də davam etdiyini izah etməyə və qanunvericiliyin tələblərinin hamıya eyni qaydada tətbiq olunmasını təmin etməyə çağırırıq.(Mediatvaz.com)
Nyus.Az
