Abşeron rayonunun Mehdiabad qəsəbəsində, 4 nömrəli məktəbin yaxınlığında aparılan fərdi yaşayış evlərinin tikintisi ilə bağlı redaksiyamıza daxil olan məlumatlar ciddi narahatlıq doğurur. Redaksiyaya təqdim edilən məlumatlara və videogörüntülərə əsasən iddia olunur ki, burada inşa edilən fərdi yaşayış evlərində evlərarası məsafə normaları gözlənilmir, tikinti qaydaları kobud şəkildə pozulur, şəhərsalma prinsiplərinə isə açıq-aşkar məhəl qoyulmur.Araşdırma zamanı şəhərsalma üzrə açıq məlumat bazasında həmin tikinti ilə bağlı hər hansı məlumat aşkar edilməyib. Bu isə haqlı suallar yaradır: tikinti hansı sənədlər əsasında aparılır? Layihə təsdiq olunubmu? Müvafiq icazələr mövcuddurmu? Daxil olan digər məlumatlarda bildirilir ki, tikintidə çalışan fəhlə və ustaların heç biri ilə əmək müqaviləsi bağlanmayıb. Bu təkcə şəhərsalma normaları deyil, əmək qanunvericiliyinin tələbləri də pozulur. Sabah tikintidə bədbəxt hadisə baş versə, məsuliyyəti kim daşıyacaq?Məlumatlara görə, söhbət satış məqsədilə tikilən, "makler evləri" kimi tanınan yaşayış evlərindən gedir. Belə olan halda sual yaranır: qanunvericiliyin tələbləri niyə nəzərə alınmır? Ən düşündürücü məqam isə aidiyyəti dövlət qurumlarının susqunluğudur. Abşeron Rayon İcra Hakimiyyəti, Fövqəladə Hallar Nazirliyi, şəhərsalmaya nəzarət edən qurumlar və digər məsul təşkilatlar bu tikintidən xəbərsizdirlər, yoxsa xəbərdar olduqları halda göz yumurlar?Qanun hamı üçün eyni olmalıdır. Sadə vətəndaş hasarını bir metr irəli çəkəndə dərhal müdaxilə edən qurumlar, yüz minlərlə manatlıq tikintilərdə ortaya çıxan iddiaları niyə görməzdən gəlirlər?
Redaksiya məsələ ilə bağlı aidiyyəti dövlət qurumlarına rəsmi sorğular ünvanlayacaq və daxil olacaq cavabları olduğu kimi ictimaiyyətə təqdim edəcək. Qarşı tərəfin cavab haqqını tanıyırıq
Nyus.Az
