Yasamal rayonu, Fərman Salmanov küçəsində fəaliyyət göstərən "OBA" marketin qarşısından çəkilən bu görüntü, paytaxtda ticarət mədəniyyətinin və qida təhlükəsizliyinin hansı acınacaqlı vəziyyətdə olduğunu növbəti dəfə subut edir.
Aidiyyəti qurumların rəsmi tələblərinə, qanunlara və ən əsası insan sağlamlığına qarşı nümayiş etdirilən bu saymazyana münasibət artıq dözülməz həddə çatıb. Mağazanın rəhbərliyi, daxili sahəni genişləndirmək və ya anbar yükünü azaltmaq naminə, qorxub-çəkinmədən piyada səkisini zəbt edərək açıq havada əsl xaos yaradıb.
Tonlarla qablaşdırılmış su və içki blokları, yayın bu bürkü xəstəlik gətirən istisində, birbaşa günəş şüalarının altında, qızmar asfalta düzülüb. Hər kəsə bəllidir ki, plastik qabların günəş altında qızması nəticəsində suya ölümcül kimyəvi maddələr süzülür və bu sular faktiki olaraq zəhərə çevrilir. "OBA" market isə sanki qazanc xatirinə vətəndaşların sağlamlığını hədəfə alıb və bu biabırçılığa göz yumur. Üstəlik, küçədən keçən yüzlərlə avtomobilin egzoz qazları, toz-torpağı birbaşa olaraq həmin məhsulların üzərinə çökür. Bununla da kifayətlənməyib, sərgi arabalarını və boş konstruksiyaları yolun ortasına ataraq piyadaların, xüsusilə də uşaqlı anaların və fiziki məhdudiyyətli şəxslərin hərəkət hüququnu kobud şəkildə pozurlar. İnsanları canı bahasına avtomobil yoluna çıxmağa məcbur edən bu özbaşınalıq, həm Qida Təhlükəsizliyi Agentliyinin (AQTA), həm də yerli icra strukturlarının fəaliyyətsizliyindən və nəzarətsizliyindən qaynaqlanır.
Hesab edirik ki, şəhərin estetik görünüşünü zibilliyə çevirən, istehlakçıların hüquqlarını ayaq altına atan və insan həyatını heçə sayan bu qanunsuz ticarət özbaşınalığına dərhal son qoyulmalı, market rəhbərliyi barəsində ən sərt hüquqi tədbirlər görülməlidir.(Mediatvaz.com)
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!
Nyus.Az
