Bakının mərkəzində, dünya memarlığının ən möhtəşəm nümunələrindən biri hesab olunan Heydər Əliyev Mərkəzinin bir addımlığında – Həsənoğlu küçəsində, məşhur "Nezih" restoranının düz arxasında yerləşən hündürmərtəbəli yaşayış binasının damında baş verənlər artıq sadəcə qanun pozuntusu deyil, açıq-aşkar dövlətin şəhərsalma siyasətinə meydan oxumaqdır.
Nyus.Az xəbər verir ki,Mediatvaz.com-un redaksiyasına təqdim olunan görüntülər heyrət doğurur. İstismara verilmiş bir neçə yaşayış binasının damında qanunsuz artırma işləri aparılıb. Bu mənzərə Bakının mərkəzində illərdir formalaşdırılan memarlıq simasına vurulan növbəti zərbədir. Ən maraqlısı isə budur: bu artırmalar hansı əsasla tikilib? Bina uzun illər əvvəl istifadəyə verilib. Damda sonradan inşa edilən bu tikililər hansı layihəyə əsasən həyata keçirilib? Yoxsa kimsə düşünüb ki, istədiyi vaxt binanın damını da şəxsi torpaq sahəsinə çevirə bilər?Ortaya çox ciddi suallar çıxır. Əgər bu artırmalara qanuni sənəd verilibsə, onu hansı əsasla veriblər? Daşınmaz əmlakın dövlət reyestri orqanı sonradan tikilən bu konstruksiyaları hansı hüquqi sənədlə rəsmiləşdirib? Ümumiyyətlə, belə bir sənədləşmə mümkündürmü? Bəs bu özbaşınalıqdan Şəhərsalma və Arxitektura Komitəsinin xəbəri varmı? Fövqəladə Hallar Nazirliyi bu artırmaların yanğın təhlükəsizliyi və daşıyıcı konstruksiyalara təsirini araşdırıbmı? Yerli icra hakimiyyəti və digər aidiyyəti qurumlar bu qanunsuz tikintini görmür, yoxsa görmək istəmirlər? Çünki söhbət adi hasardan və ya kiçik bir köməkçi tikilidən getmir. Söhbət çoxmərtəbəli yaşayış binasının damında həyata keçirilən iri həcmli artırmalardan gedir. Belə müdaxilələr binanın daşıyıcı konstruksiyalarına əlavə yük yarada, sakinlərin həyatını təhlükə altına sala və fövqəladə vəziyyət zamanı ciddi faciələrə səbəb ola bilər. Əgər Bakının mərkəzində, Heydər Əliyev Mərkəzinin yaxınlığında belə açıq şəkildə qanunsuz tikinti aparmaq mümkündürsə, onda şəhərsalma qanunları kimlər üçün nəzərdə tutulub? Sadə vətəndaş üçün, yoxsa hamı üçün?
Qarşı tərəfin cavab haqqını tanıyırıq
Diqqət! Sizdə gizli mətnin baxışı üçün hüquq yoxdur.
