Azərbaycan Respublikasının Seçki Məcəlləsində aşağıdakı dəyişikliklər edilib:
1. 3-cü maddədə “milliyyətindən” sözü “etnik mənsubiyyətindən” sözləri ilə əvəz edilsin.
2. 25.2.6-cı maddədən “seçki bülleteninin qoyulması üçün zərflərin,” sözləri, 25.2.11-ci və 31.1.5-ci maddələrdən “seçki bülletenlərinin qoyulması üçün zərflərin,” sözləri çıxarılsın.
3. 42.2.9-cu maddədə “möhürləndiyi” sözü “kilidləndiyi” sözü ilə əvəz edilsin.
4. 47.9-cu maddədən “vəsiqələri paylandıqdan və seçici” sözləri çıxarılsın.
5. 53-cü maddə üzrə:
5.1. 53.6-cı maddənin birinci cümləsində “qərar” sözü “qərarı, həmçinin seçicilərin imzalarının toplanması üçün imza vərəqələrini” sözləri ilə əvəz edilsin və həmin maddəyə aşağıdakı məzmunda üçüncü cümlə əlavə edilsin:
“İmza vərəqələrini götürən namizəd və ya onun səlahiyyətli nümayəndəsi hər imza vərəqəsinin aşağı künc hissəsində imza qoyur.”;
5.2. 53.7-ci maddədə “sürülməsini təsdiq edən qərarın surətini verməkdən” sözləri “sürülməsinin təsdiq olunmasından” sözləri ilə əvəz edilsin.
6. 54-cü maddə üzrə:
6.1. 54.9-cu maddəyə aşağıdakı məzmunda üçüncü və dördüncü cümlələr əlavə edilsin:
“Seçki komissiyası namizədin təsdiq olunması barədə qərar qəbul etdikdə, həmin qərarı və seçicilərin imzalarının toplanması üçün imza vərəqələrini siyasi partiyanın, siyasi partiyalar blokunun səlahiyyətli nümayəndəsinə təqdim edir. İmza vərəqələrini götürən səlahiyyətli nümayəndə hər imza vərəqəsinin aşağı künc hissəsində imza qoyur.”;
6.2. 54.10-cu maddənin birinci cümləsində “Namizədin qeydə alınmasından” sözləri “İrəli sürülmüş namizədin təsdiq olunmasından” sözləri ilə əvəz edilsin.
7. 59.3-cü maddənin dördüncü cümləsində “İmza” sözü “Bu Məcəllənin 59.4-cü maddəsində nəzərdə tutulan hal istisna olmaqla, imza” sözləri ilə əvəz edilsin.
8. 73-1.2-ci maddənin dördüncü cümləsi çıxarılsın.
9. 90.7-ci maddədə “Teleradio verilişləri təşkilatlarına və dövri nəşrlərin redaksiyalarına pulsuz efir vaxtının və dövri nəşrdə ayrılmış yerin dəyərini ödədikdən sonra, qeydə” sözləri “Qeydə” sözü ilə əvəz edilsin.
10. 100-cü maddə üzrə:
10.1. 100.2.2-ci və 100.2.7-ci maddələrdən “(Milli Məclisə seçkilər və bələdiyyə seçkiləri istisna olmaqla)” sözləri çıxarılsın;
10.2. 100.2.13-cü maddədən “olan zərflərdə” sözləri çıxarılsın.
11. 103.4-cü maddənin birinci cümləsində “möhürlənir” sözü “kilidlənir” sözü ilə, ikinci cümləsində “Möhürlər” sözü “Kilidlər” sözü ilə əvəz edilsin.
12. 104-cü maddə üzrə:
12.1. 104.5-ci maddədə “möhürləyir” sözü “kilidləyir” sözü ilə əvəz edilsin;
12.2. 104.6-cı maddənin birinci cümləsindən “seçici vəsiqələrini,” sözləri çıxarılsın;
12.3. 104.7-ci maddənin birinci cümləsindən “seçici vəsiqəsi ilə birlikdə” sözləri çıxarılsın;
12.4. 104.7-ci maddə (ikinci halda) ləğv edilsin.
13. 105.2-ci maddənin beşinci cümləsi çıxarılsın.
14. 106.1-ci maddənin beşinci cümləsindən “və zərf” sözləri çıxarılsın, yeddinci cümləsində “möhür və plomblarının” sözləri “kilidlərinin (daşınan seçki qutusunda isə həmçinin yarığın üzərindəki möhürün)” sözləri ilə əvəz edilsin.
15. 107.4-cü maddənin birinci cümləsindən və 108.3-cü maddənin birinci cümləsindən “zərflərin və” sözləri çıxarılsın.
16. 145.1-ci maddəyə “hissəsinə” sözündən sonra “, 981-ci maddəsinin II hissəsinin ikinci cümləsinə” sözləri əlavə edilsin.
17. 148.6-cı maddənin birinci cümləsindən “namizəd irəli sürmüş və ya” sözləri çıxarılsın.
18. 153-cü maddə üzrə:
18.1. 153.1-ci maddədə “73-cü” sözləri “73-1-ci” sözləri ilə əvəz edilsin;
18.2. 153.2-ci maddədə “73.1-73.2-ci” sözləri “73-1.1-ci və 73-1.2-ci” sözləri ilə əvəz edilsin.
19. 162-ci, 164-cü, 195-ci və 197-ci maddələr ləğv edilsin.
20. 173.2-ci maddənin ikinci cümləsində “73.3-cü” sözləri “73-1.3-cü” sözləri ilə əvəz edilsin.
21. 175.3-cü maddə üzrə:
21.1. birinci cümlədə “2, 4 və 5-ci” sözləri “2-ci, 4-cü, 5-ci, 6-cı və 7-ci” sözləri ilə əvəz edilsin;
21.2. ikinci cümlə aşağıdakı redaksiyada verilsin:
“Mərkəzi Seçki Komissiyasının bu barədə qərarı rəsmi dərc edildiyi gündən 10 gün müddətində həmin qərardan apellyasiya instansiyası məhkəməsinə şikayət verilə bilər.”;
21.3. aşağıdakı məzmunda üçüncü-beşinci cümlələr əlavə edilsin:
“Həmin şikayətə 15 gün müddətində baxılmalıdır. İş üzrə apellyasiya instansiyası məhkəməsinin qərarından həmin qərarın tam formada təqdim olunduğu gündən 10 gün müddətində Ali Məhkəməyə şikayət verilə bilər. Bu şikayətə 15 gün müddətində baxılmalıdır.”.
22. 176-cı maddə üzrə:
22.1. 176.1-ci maddəyə “müraciət” sözündən sonra “(rəsmi məlumat)” sözləri əlavə edilsin;
22.2. 176.2-ci maddədə “ərizə” sözündən sonra “(rəsmi məlumat)” sözləri, “ərizədə” sözündən sonra “(rəsmi məlumatda)” sözləri əlavə edilsin;
22.3. aşağıdakı məzmunda 176.2-1-ci maddə əlavə edilsin:
“176.2-1. Azərbaycan Respublikası Konstitusiyasının 89-cu maddəsinin I hissəsinin 6-cı və 7-ci bəndlərində göstərilən hallarla əlaqədar Mərkəzi Seçki Komissiyasına Milli Məclisin rəsmi məlumatı daxil olduqdan sonra 15 gündən gec olmayaraq Mərkəzi Seçki Komissiyası həmin rəsmi məlumatı müzakirə edərək müvafiq qərar qəbul edir.”;
22.4. 176.3-cü maddədə “və 5-ci” sözləri “, 5-ci, 6-cı və 7-ci” sözləri ilə əvəz edilsin;
22.5. 176.4-cü maddədə “bir ay müddətində” sözlərindən sonra “(deputatın mandatdan məhrum edilməsi haqqında Mərkəzi Seçki Komissiyasının qərarından məhkəməyə şikayət verdiyi hallar istisna olmaqla)” sözləri və həmin maddəyə aşağıdakı məzmunda ikinci cümlə əlavə edilsin:
“Deputatın mandatdan məhrum edilməsi haqqında Mərkəzi Seçki Komissiyasının qərarından məhkəməyə şikayət verdiyi hallarda müvafiq birmandatlı seçki dairəsi üzrə əlavə seçkilər məhkəmədə işə baxılmasının nəticələrindən asılı olaraq təyin edilir.”.
23. 179-cu maddə üzrə:
23.1. 179.1-ci maddənin birinci cümləsində “bitərsə,” sözündən sonra “habelə Konstitusiyanın 101-ci maddəsinin I hissəsinin ikinci cümləsinə əsasən Prezidentin elan etdiyi halda” sözləri əlavə edilsin, ikinci cümləsində “Bu hal” sözləri “Konstitusiyanın 104-cü maddəsində nəzərdə tutulmuş hallar” sözləri ilə əvəz edilsin;
23.2. 179.2-ci maddədə “edildiyi” sözündən sonra “, həmçinin Konstitusiyanın 101-ci maddəsinin I hissəsinin ikinci cümləsinə əsasən Prezident növbədənkənar Prezident seçkilərini elan etdiyi” sözləri əlavə edilsin, “3 ay ərzində” sözləri “60 gün müddətində” sözləri ilə əvəz edilsin.
24. 187-ci maddədə “73-cü” sözləri “73-1-ci” sözləri ilə əvəz edilsin.
25. 212-ci maddədə “Seçkilər günü 21 yaşı tamam olan (seçki günü də daxil olmaqla) və yaşı 21-dən yuxarı” sözləri “Seçkilərdə iştirak etmək hüququna malik” sözləri ilə əvəz edilsin.
26. 221-ci maddə üzrə:
26.1. 221.1-ci maddədə “73-cü” sözləri “73-1-ci” sözləri ilə əvəz edilsin;
26.2. 221.2-ci maddədə “73.1-73.3-cü” sözləri “73-1.1-ci və 73-1.2-ci” sözləri ilə əvəz edilsin.
27. 1 “A” saylı əlavədə “Deputatlığa namizədin, siyasi” sözləri “Siyasi” sözü ilə əvəz edilsin.
28. 2 “A” saylı əlavədə “Prezidentliyə namizədin, siyasi” sözləri “Siyasi” sözü ilə əvəz edilsin.
29. 3 “A” saylı əlavədə “Bələdiyyə üzvlüyünə namizədin, siyasi” sözləri “Siyasi” sözü ilə əvəz edilsin.
30. 4 saylı əlavənin “Qeyd”i ləğv edilsin.
