Prezident İlham Əliyevin bir sıra rayonların icra hakimiyyətlərinə təyin olunan başçıları qəbul etməsi və onlara strateji istiqamət göstərməsi çox önəmli idi. Bu, həm də son illərdə aparılan islahatların mahiyyətini bir daha nümayiş etdirdi. Prezidentin çıxışında xalqa xidmət və sosial ədalət prinsipi ön plana çəkildi. Dövlət başçısı vurğuladı ki, hər bir rəhbər vəzifəli şəxs xalqa xidmət etməyi özünün əsas missiyası hesab etməlidir. O, yeni təyin olunan rəhbərlərə xatırlatdı ki, xalqa yaxın olmaq, xalqla bir yerdə olmaq idarəçiliyin başlıca qayəsidir. Prezident məmur davranışının əhəmiyyətinə də xüsusi toxundu. O, dövlət qulluqçularının təkəbbür və lovğalıqdan uzaq, təvazökar olmasını tələb etdi: "Məmur özünü xalqdan üstün tutmamalıdır". Dövlət başçısı eyni zamanda bir daha xatırlatdı ki, korrupsiya və rüşvətxorluğa qarşı mübarizə qətiyyətlə davam etdiriləcək və heç bir qanunsuz hərəkət nəticəsiz qalmayacaq.
Siyasi elmlər üzrə fəlsəfə doktoru, politoloq Şəbnəm Həsənova "Şərq"ə deyib ki, dövlət başçımızın nitqi, istifadə etdiyi üslub və ritorika tam şəffaf idarəçilik sistemindən xəbər verir. Ekspertə görə, ali rəhbərliyin bu kadrlardan tələb etdiyi dəyişməyən amil xalqa ləyaqətlə xidmət etmək, xalqı özündən, özünü də insanlardan ayrı tutmamaqla bütünləşməkdir: "Bu insanlar qarşısında əsas iş prinsipləri məhz dövlət başçımızın verdiyi tapşırıqlardır. “Məmur təkəbbürü” deyə yanlış anlayışın məqsədli formalaşdırılması xalqla dövlət arasında təmasın qırılmasına, etimadsızlıq mühitinin yaradılmasına xidmət edirdi. Cənab Prezident bildirdi ki, artıq dövlət aparatında təmizlənmə işləri aparılıb. Amalımız uzunmüddətli həyat qabiliyyətinə, yaşayıb-yaratmaq iradəsinə malik cəmiyyətə və hamı üçün davamlı gələcəyə investisiya qoyulmağa yönəldilməlidir. Davamlı inkişafa verilən töhfə sosial məsuliyyətdir. Buna görə də cənab Prezidentin bu çıxışı bütünlüklə “sosial məsuliyyət” anlayışı üzərində qurulmuşdu. Dövlət başçımızın nitqi boyu səsləndirdiyi hər bir fikir dəyərlidir, bir fikir isə həm də önəmlidir. O da “sizə heç kim qanunsuz tapşırıq verməyəcək” bəyanatıdır. Dövlət başçısı məmura yeni bir davranış donu biçdi. Bu don müasirliklə xalqın arasında bir olmağın mükəmməl şəkildə vəhdət təşkil oluna bilməyin mümkünlüyünün nümunəvi formasıdır. Sadəcə struktur, kadr islahatlarının yenilənməsi, təkmilləşdirilməsindən söhbət getmir, dəyərlər sistemimiz də yıxıcı, bölücü, ümumi işə kölgə salan amillərdən də, amallardan da, bunlara xidmət edən kəslərdən də uzaq tutulmalı, təmizlənməlidir. Buna görədir ki, dövlət başçımız qəbul etdiyi kadrlara bildirdi ki, istənilən neqativ halla bağlı dövlət başçısına məlumat verilməlidir".
İqtisadçı Eldəniz Əmirov da "Şərq"ə bildirib ki, icra başçılarının fəaliyyəti rayonların iqtisadi inkişafı üçün çox önəmlidir: "Düzdür, rayonların iqtisadi inkişafı tam olaraq icra başçısının fəaliyyətindən asılı deyil. Amma böyük ölçüdə bunun öz təsirləri var. Yerli iqtisadi dinamikanın formalaşmasında idarəetmənin peşəkarlığı, təşəbbüskarlığı və məsuliyyət hissi mühüm rol oynayır. Amma bu iş yalnız idarəçilik bacarığı ilə məhdudlaşmır. İcra başçısının uğuru həm də insanın daxilindən gələn dəyərlərdən, vicdan, ədalət hissi, empatiya və məsuliyyət duyğusundan asılıdır. Çünki iqtisadi qərarlar yalnız rəqəmlərlə deyil, insanların talelərinə təsir edən seçimlərlə bağlıdır. İnsani keyfiyyətlərlə idarə olunan bölgədə etimad mühiti yaranır, vətəndaş dövlətə inanır, sahibkar təşəbbüs göstərməkdən çəkinmir. Naxçıvan Muxtar Respublikasında isə həm yeni idarəetmə yanaşması, həm də tətbiq olunan vergi və gömrük güzəştləri bu regiona əlavə dividendlər verir. Güzəştlər sahibkarlığın genişlənməsinə, istehsalın artmasına və iqtisadi mühitin canlanmasına real təsir göstərə bilər. Əlqərəz, cənab Prezidentin son təyinatları, səsləndirdiyi fikirlər və verdiyi tapşırıqlar bir daha təsdiqləyir ki, bir rayonun iqtisadi inkişafı üçün rayonu idarəedənin təhsil göstəriciləri və iş təcrübəsindən daha çox, vicdanlı idarəetmə və insani dəyərlərə söykənən liderlik prinsipləri önəmlidir".
Nyus.Az
