Hazırda Azərbaycan-Şimali Makedoniya münasibətlərinin inkişaf dinamikası məmnunluq doğurur. Sağlam təməllər üzərində qurulmuş münasibətlərimiz, səmərəli birgə fəaliyyətimiz ölkələrimizin maraqlarına və xalqlarımızın mənafelərinə xidmət edir.
Nyus.Az AZƏRTAC-a istinadən xəbər verir ki, bu fikirlər Azərbaycan Prezidenti İlham Əliyevin Şimali Makedoniya Prezidenti xanım Qordana Silyanovska-Davkovaya bu ölkənin milli bayramı - Müstəqillik Günü münasibətilə ünvanladığı təbrik məktubunda yer alıb.
Qordana Silyanovska-Davkovanın cari ilin mart ayında Azərbaycana rəsmi səfərinin ölkələrimiz arasında dostluq və əməkdaşlıq əlaqələrinə yeni təkan verdiyini qeyd edən dövlətimizin başçısı məktubunda vurğulayıb: "Bu gün dövlətlərarası əməkdaşlığımızın bir sıra sahələrdə daha da dərinləşməsi və yeni məzmunla zənginləşməsi üçün yaxşı imkanlar vardır. Siyasi əlaqələrimizin yüksək səviyyəsi və fəal dialoqumuz bunun üçün yaxşı zəmin yaradır".
Prezident İlham Əliyev ümidvar olduğunu bildirib ki, Azərbaycan ilə Şimali Makedoniya arasında dostluq və əməkdaşlıq münasibətləri həm ikitərəfli əsasda, həm də beynəlxalq təşkilatlar çərçivəsində bundan sonra da birgə səylərlə uğurla inkişaf edəcək və möhkəmlənəcək.
Nyus.Az
