Natiq Miri: “Həmin müxalifətin Azərbaycanda nəyisə dəyişəcəyini düşünmürəm”
Son zamanlar Azərbaycan müxalifəti daxilində ciddi dəyişikliklərin şahidi olmaqdayıq. Ölkə daxilində meydana çıxan yeni qüvvələr, eləcə də, xaricdə mühacirlərdən ibarət formalaşan müxalifət bir-birinin ardınca ənənəvi müxalifətin mövqelərini təhvil alır.
25 ildir siyasətdə təmsil olunan liderlərin siyasi fəaliyyətdə bu qüvvələrə uduzduqları göz önündədir. Xüsusilə, xaricdəki müxalifət daxilindən önə çıxan isimlər daha çox populyarlıq qazanırlar. Bunu onların facebook səhifələri üzərindən etdikləri canlı yayımlarda açıq şəkildə görürük. Məsələn, Azərbaycan müxalifətinin öndə gedən siyasətçilərindən biri olan AXCP lideri Əli Kərimlinin facebookdakı canlı yayımı ilə xaricdəki mühacirlərin fərdi şəkildə etdikləri yayımlar arasında baxış sayında ciddi fərqlər var. Bəzən dəfələrlə mühacirlərin canlı yayımı AXCP rəhbərini üstələyir. Bütün bunlar da mühacir müxalifətin ölkə daxilindəki müxalif qüvvələrdən bir addım önə keçdiyini göstərir.
Ekspertlər mövcud durumun Azərbaycan dövləti üçün təhlükəli vəziyyət yarada biləcəyini dilə gətirirlər. Arqument kimi də, adətən xarici dairələrin bir ölkədə dəyişiklik etmək planlarını işə salanda bu tipli qüvvələrdən istifadə etməyə daha çox üstünlük verdikləri önə çəkilir. Əslində belə qüvvələri ələ almaq həmin dairələr üçün o qədər də çətin deyil.
Siyasi şərhçi Natiq Miri bildirdi ki, xaricdən internet üzərindən həyata keçirilən canlı yayımlara olan baxışların çoxluğu həmin insanların populyarlığı ilə bağlı deyil: “Bunu onların nüfuzu kimi qələmə vermək aldadıcı yanaşma olardı. Bu daha çox Azərbaycanda alternativ fikrin efirə çıxma imkanlarının olmaması ilə bağlıdır. Əgər xaricdə belə Azərbaycanla bağlı bu tipli alternativ fikir internet məkanına daşınırsa və ictimaiyyət də buna maraq göstərirsə, cəmiyyət demək belə fikirlərə acdır. Eyni zamanda, bu həm də onun göstəricisidir ki, artıq Azərbaycan xalqı alternativ fikirlər axtarışındadır. Bu Avropaya mühacirətə gedənlərin populyarlığı ilə heç bir mənada bağlı deyil. Açığı bu gün Avropada fəaliyyət göstərən mühacirlər Azərbaycan dövləti və cəmiyyəti üçün hər hansı bir təhlükə də yaratmırlar. Bu insanlar orada olduqca, fəaliyyət göstərdikcə, onların Azərbaycana gəlmək imkanları sıfıra bərabərdir. O insanlar isə ölkəyə gəlmədikcə, onların hakimiyyət üçün potensial təhlükə törətmələri mümkün deyil. Biz bunun ən azından 2013-cü ilin prezident seçkilərində Rüstəm İbrahimbəyov namizədliyində şahidi olmuşuq. Sadəcə olaraq onların populyarlığı səsləndirdikləri müxalif fikirlərlə bağlıdır. Ölkəmizdə bu cür fikirlər artıq demək olar yox dərəcəsindədir. Deməli Azərbaycanda müxalifətə rəhbərlik edən şəxslər situasiyanı dəyişməlidirlər. Məsələnin əsas kökü bundadır. Onlar heç cür cəmiyyətdə proses yarada bilmirlər. Azərbaycan müxalifəti yalnız hakimiyyətin yaratdığı prosesin arxasınca sürünürlər. Onlara yaradılan problemləri uzun zaman kəsiyində həll etmək məcburiyyətində qalırlar. Hansı ki, prosesi müxalifət yaratmalıdır ki, ən azından problemi həll etmək üçün hakimiyyət düşünsün”.
Siyasi şərhçi xaricdəki mühacirlərin Avropada olan beynəlxalq qurumlarla əlaqələr qurduğunu və onlara Azərbaycan hakimiyyəti haqqında real informasiyalar ötürdüklərini də qeyd etdi: “Həmin mühacirlər belə yollarla ən azından hakimiyyət haqqında mənfi fikirlərin formalaşmasına çalışırlar. Onların fəaliyyəti yalnız bundan ibarətdir. Ondan o tərəfə bu insanların nəyəsə gücləri çatası deyil. Heç bir halda həmin müxalifətin Azərbaycanda nəyisə dəyişəcəyini düşünmürəm. Bu heç yaxın müddət üçün də proqnozlaşdırılmır. Sadəcə onların aktiv və güclü olmaları üçün Azərbaycan daxilində söykənə biləcəyi ciddi ictimai, siyasi güc olmalıdır. Bu olmaqdıqca onların Avropada nə qədər gücləri stəkanda fırtına qoparmaqdan o tərəfə bir şey deyil”.
Cavanşir ABBASLI
“Yeni Müsavat”
