Xarici işlər naziri Elmar Məmmədyarov Qoşulmama Hərəkatının Bakıda keçirilən aralıq nazirlər konfransında iştirak etmək üçün Azərbaycanda səfərdə olan BMT Baş Assambleyasının sədri Miroslav Layçakı qəbul edib.
Xarici İşlər Nazirliyinin mətbuat xidmətindən verilən məlumata görə, M.Layçak Slovakiya xarici işlər naziri kimi 2010-cu ildə Azərbaycana səfərini xoş təəssüratlarla xatırlayaraq, bu illər ərzində Azərbaycanın bütün sahələrdə inkişafının təqdirəlayiq olduğunu vurğulayıb və yenidən Bakıda olmaqdan məmnunluğunu ifadə edib.
M.Layçak həmçinin Qoşulmama Hərəkatı xarici işlər nazirlərinin Bakı toplantısının yüksək səviyyədə təşkil olunduğunu vurğulayıb.
Tərəflər Azərbaycan və BMT əlaqələri barəsində geniş fikir mübadiləsi aparıb və münasibətlərin daha da dərinləşdirilməsi perspektivlərini müzakirə ediblər. E.Məmmədyarov Azərbaycanın BMT-nin seçkili orqanlarında iştirak etməklə BMT Nizamnaməsinin məqsəd və prinsiplərinin yerinə yetirilməsinə öz töhvəsini verdiyini vurğulayıb və bu xüsusda, Azərbaycanın BMT Təhlükəsizlik Şurasına qeyri-daimi üzvlüyünə seçilməsi, eləcə də TŞ-na sədrlik dövründə fəaliyyəti barəsində danışıb. O, həmçinin Azərbaycanın BMT-nin ixtisaslaşmış və digər qurumları ilə əməkdaşlığın genişləndirilməsində maraqlı olduğunu bildirib.
M.Layçak BMT-nin fəal üzvü kimi təşkilatın Azərbaycanla əlaqələrə önəm verdiyini və münasibətlərin dərinləşməsində Azərbaycanın səylərinin, BMT-nin təşəbbüsü ilə təşkil olunmuş qlobal miqyaslı tədbirlərə yüksək səviyyədə ev sahibliyi etməsinin yüksək qiymətləndirildiyini vurğulayıb.
Görüşdə həmçinin Ermənistan-Azərbaycan münaqişəsi üzrə danışıqlar prosesinin son statusu, eləcə də gündəlikdə duran digər məsələlər ətrafında fikir mübadiləsi aparılıb.
E.Məmmədyarov BMT Təhlükəsizlik Şurasının münaqişə ilə bağlı qəbul etdiyi müvafiq qətnamələrin işğalçı qüvvələrin bütün işğal olunmuş Azərbaycan ərazilərindən çıxarılmasını tələb etdiyi halda Ermənistanın bu tələblərə əməl etmədiyini və güc tətbiq edərək Azərbaycan ərazilərini işğal altında saxlamaqda davam etdiyini diqqətə çatdırıb.
Görüşdə BMT Baş Assambleyasının gündəliyinə duran məsələlər, Azərbaycan tərəfindən Dayanıqlı İnkişaf Məqsədlərinin uğurla icrası və digər məsələlər ətrafında fikir mübadiləsi aparılıb.
