"Qoşulmama Hərəkatının videokonfransı ilə bağlı mən bir neçə istiqamətə diqqət çəkmək istəyərdim, önəmli olan məqamlara. Birinci məqam ondan ibarətdir ki, Azərbaycan təkcə bölgədə deyil, bütövlükdə daha geniş, qlobal miqyasda birləşdirici amil rolunu oynamağa başlayıb. Bu proses uzun müddətdir ki, bildiyimiz kimi, həyata keçir. Koronavirus pandemiyasına qarşı mübarizə tədbirləri çərçivəsində ölkəmizin atdığı addımlar təkcə Azərbaycan xalqının mənafeyini deyil, bütövlükdə həm region xalqlarının, daha geniş miqyasda, dünya xalqlarının taleyini düşündüyünü, humanizm prinsiplərindən çıxış etdiyini Qoşulmama Hərəkəti ilə bağlı keçirilən videokonfranda özünü qabarıq şəkildə büruzə verdi".
Bu fikirləri Milli.Az-a açıqlamasında siyasi ekspert Elçin Mirzəbəyli bildirib.
Ekspert qeyd edib ki, ilk dəfə Türk dövlət başçılarının Zirvə görüşünün də ideyası məhz Azərbaycan tərəfindən gəlmişdi: "Burada, təbii ki, ortaq dil, ortaq mədəniyyət və tarix faktorlarına söykənərək, bu pandemiyaya qarşı ortaq dəyərləri paylaşan xalqların və dövlətlərin birgə mübarizəsini təşkil edilməsi məsələsi gündəmdə idi. Amma daha geniş miqyasda artıq Azərbaycan ikinci addım atdı və bu ikinci addımın atılması prosesində də çox önəmli bir məqam cənab Prezident tərəfindən vurğulandı ki, bu da BMT çərçivəsində Baş Assambleyanın videokonfrans şəklində keçirilməsi təşəbbüsü idi".
E.Mirzəbəyli vurğulayıb ki, əslində, mahiyyət etibarı ilə, yəni ərazi baxımından və bəlkə də say baxımından dünyanın kiçik ölkələrindən biri olan Azərbaycan dünyaya böyük ideyalar təqdim etməyə çalışıb: "Bu proses o zaman baş verir ki, dünyanın ayrı-ayrı ölkələrində, hətta eyni birlik və ittifaq çərçivəsində birləşən dövlətlər belə bu çətin anlarda bir-birilərinə yardım əlini uzatmaqdan çəkinirlər.
Və biz artıq ötən müddət ərzində bu proseslərin İtaliyaya və ya İspaniyaya münasibətdə özünü necə biruzə verdiyinin şahidi olmuşuq. Amma buna baxmayaraq ilk gündən dünya enerji bazarında baş verən problemlərə və iqtisadiyyatda pandemiya səbəbindən dünyada yaşanan tənəzzül prosesinə baxmayaraq, Azərbaycan təkcə öz vətəndaşlarının taleyini deyil, bütövlükdə digər insanların da taleyini düşündü və bununla bağlı həm qonşu dövlətə yardım göstərdi, həm Ümumdünya Səhiyyə Təşkilatına beş milyonluq yardım göstərdi. Afrikada yaşayanlara və digər ölkələrdə yaşayanlara, pandemiyaya qarşı mübarizə aparmağa çətinlik çəkən dövlətlərə yardım məqsədilə maliyyə vəsaiti Azərbaycan tərəfindən ayrıldı".
"Bu, humanizm nümunəsidir. Düşünürəm ki, Azərbaycan Prezidentinin məhz pandemiyaya qarşı birgə mübarizənin təşkil olunması, bu məsələdə bütün dünyada dövlətlərin birlik və həmrəyliyinin olmasının vacibliyini vurğulaması bütün dünyaya önəmli bir mesajdır. Bu mesajın da Azərbaycandan səsləndirilməsi, Azərbaycan Prezidenti tərəfindən səsləndirilməsi çox mühüm əhəmiyyət daşıyır və bu, tarixi bir prosesdir ki, Azərbaycan bu tarixi prosesdə bəşəri dəyərləri qorumağı bacaran, ən kritik situasiyalarda belə insanlığın önəmini unutmayan bir dövlət kimi tarixdə qalacaq", - ekspert qeyd edib.
Təhməz Əsəd
Milli.Az
