Xatırlatma: Ümummilli lider Heydər Əliyevin tarixi çıxışı hər bir azərbaycanlının qəlbində dərin izlərlə kök salıb. Həmin çıxışında Heydər Əliyev Bakıda ağacların kəsilməsini “öz uşaqlarının başının kəsilməsi” adlandırmışdı. O məşhur çıxışda Heydər Əliyev demişdi: “Bakıda bir ağacı əkib böyütmək bir il bir övladı böyütməyə bərabərdir. Çünki Bakıda ağac əkmək çətindir. Vaxtilə Bakıda ağaclar yox idi. İyirminci illərdə Bakıya gələn Maksim Qorkinin,Vladimir Mayakovskinin sözlərini yadınıza salın: “Bakıda cəmisi iki-üç dənə ağac gördüm”. Amma biz Bakını yaşıllaşdırdıq. Küçələri, meydanları, o cümlədən, Bakıxanov, Badamdar qəsəbəsini Bakıdan hava limanına gedən yolu yaşıllaşdırdıq. “Xalqlar Dostluğu” parkını, oradakı ağacları nə əziyyətlə saldıq. Biz iməciliklər keçirirdik, hər həftədə o ağaclar iki dəfə suvarılırdı. Bu Bakı üçündür, xalq üçündür, təbiət üçündür, Bakının iqlimi üçündür. Bəs bu ağacları kəsib onları baqqalxanaya keçirənlər bu ölkəyə xəyanət etməyiblərmi? O kəsilən ağacları indi bərpa etmək çətindir. Onlar hesab edin ki, mənim balalarımın başını kəsiblər. Onlar gərək haqq-ədalət məhkəməsi qarşısında cavab versinlər. Orda gəlib baqqal dükanları salanlar, özlərinə xüsusi mülklər salanların hamısını dağıtmaq lazımdır, qovmaq lazımdır, uçurtmaq lazımdır”.
[media=https://www.youtube.com/watch?v=d67Xw7Y9gxo]
Hətta, Prezident cənab İlham Əliyevin ağac kəsimi ilə bağlı 13 aprel 2014-cü ildə, Nazirlər Kabinetinin iclasındakı çıxışını yada salaq. Əgər Sədərək Yusif ona xalqa xidmət üçün şərait yaradan Prezidentin ağac kəsimi ilə bağlı kəskin xəbərdarlığını unudubsa, onu bir daha yada salırıq. Prezident İlham Əliyevin məlum iclasdakı çıxışından sitat:
“Biz ekoloji vəziyyətlə bağlı məsələləri daim diqqət mərkəzində saxlayırıq. Ancaq ictimaiyyəti də, məni də narahat edən məsələ ağacların kəsilməsi məsələsidir. Buna yol vermək olmaz. Hesab edirəm ki, biz burada daha da ciddi məsuliyyət tətbiq etməliyik. Ağackəsmə tam şəkildə dayandırılmalıdır. Ancaq nadir hallarda, o da Ekologiya və Təbii Sərvətlər Nazirliyinin rəyi ilə haradasa ağac ya köçürülə, ya kəsilə bilər. Ona görə mən dəfələrlə bu məsələlərlə bağlı öz fikrimi bildirmişəm. Deyə bilərəm ki, vəziyyət əvvəlki illərə nisbətən daha da müsbətdir. Ancaq biz istədiyimizə tam şəkildə nail ola bilməmişik. Gecə vaxtı gəlirlər, qanunsuz olaraq ağacları kəsirlər, yerləri düzəldirlər ki, ev tiksinlər. Bu, vicdansızlıqdır, bu, biabırçılıqdır, bu, cinayətdir”.
[media=https://www.youtube.com/watch?v=H50nTqX1Ij8]
Elə redaksiyamızın elektron ünvanına Nizami rayonu Məhsədi 59-da ünvanda iaişə obyekti tikmək məqsədi ilə ağacların kütləvi şəkildə qırılmasıyla bağlı sakinlərin etiraz məktubu daxil olmuşdur. Çəkiliş qrupu hadisə yerinə yollanmış və ağaçların qanunsuz qırılmasını lentə almışlar. Ağac qatilləri bu əməli Sədərək Yusifin göstərişi ilə həyata keçirdiklərini bildirmiş və əlavə suallara cavab verməmişlər. Qeyd edək ki, Bakının Nizami rayonu ərazisində ağacların kütləvi kəsimi davam etməkdədir. İcra hakimiyyətinin başçısı müxtəlif bəhanələrlə parkları, bağları və meşəlikləri məhv edərək imkanlı şəxslərə satmaqda davam edir. Eyni zamanda, səslərini məmurların kabinetlərinə çatdırmaq istəyən Bakı sakinlərinin etirazları eşidilməz qalır. Ekologiya və Təbii Sərvətlər Nazirliyi də yaşıllıqların məhv edilməsinin qarşısını almaq istəyir. Fəqət bu dövlət qurumunun da etirazı - səhrada çığıran şəxsin hayqırtısından başqa bir şey deyil .
P.S. Prezidentin bu cür kəskin çıxışına heç bir şərh vermək iqtidarında deyilik. Bəs görəsən, bu çıxış barədə Nizami RİH-in başçısı Arif Qasımov nə düşünür? Ancaq neçə illik ağaclar kökündən kəsilib, daşınaraq, yaşıllıq məhv edilirsə, deməli, Sədərək Yusifi Prezidentin məlum kəskin çıxışı yox, başqa şeylər düşündürür. O da maraqlıdır ki, gözlənilən böyük seçki kompaniyası ərəfəsində o qədər sakinləri dövlətdən narazı salmaqda Sədərək Yusifin məqsədi nədir? Yəqin ki, bu suallara yalnız Sədərək Yusif özü cavab verə bilər...
[media=https://www.youtube.com/watch?v=7KRBHtmcuiQ]
[media=https://www.youtube.com/watch?v=lSmcvcNhJR0]
[media=https://www.youtube.com/watch?v=vPXHWxP2efU]
[media=https://www.youtube.com/watch?v=kNPzbjoNOVk]
[media=https://www.youtube.com/watch?v=faBl6lhuWuk]
