Bu günlərdə redaksiyamıza Abşeron rayonu, Masazır kəndində yaşayan sakinlər tərəfindən, iki dəfə Sovet İttifaqı Qəhrəmanı, general-mayor Həzi Aslanovun adını daşıyan küçədə yaşayan çoxsaylı problemlərlə bağlı şikayət ərizəsi daxil olub. Sakinlər yazdıqları şikayət ərizəsində bildirirlər ki, “yaşadığımız küçə Həzi Aslanovun adını daşısa da, Abşeron RİH-i başçısının və adı çəkilən qurumda çalışan bəzi vəzifə sahiblərinin səhlənkarlıqları, hətta açıq-aşkar şəkildə problemlərin həllinə biganə yanaşmaları səbəbindən, bu gün də küçəmiz bərbad haldadır. Buna əsas səbəb, Həzi Aslanovun adını daşıyan küçədə kanalizasiya boru xəttinin olmamasıdır. Belə ki, yayın isti günlərində axıdılan çirkab suları gölməçələr yaradır və hər kəs üfunət iyindən cana doyur. O halın varlığına da diqqət yetirmək lazımdır ki, bugünə kimi Abşeron RİH-i başçısı İradə xanım Gülməmədovaya bir neçə dəfə yazılı ərizə ilə müraciətlər ünvanlamışıq. Adı çəkilən xanım yaşadığımız küçədə kanalizasiya boru xəttinin çəkilməsi, üz-üzə qaldığımız problemləri həll etmək əvəzinə, ünvanladığımız müraciətlərin “itbata salınması”na şərait yaradıb.
Bir anlığa diqqət yetirək ki, bu ilin 9 mayında İkinci Dünya müharibəsində faşizm üzərində qələbənin 74-cü ili tamam oldu. Baş vermiş qanlı müharibədə təqribən 660 mindən çox azərbaycanlının iştirak etdiyi və onlardan təxminən yarısının döyüşlərdə həlak olduğu bildirilir. Döyüşlərdə göstərdikləri igidliyə görə, 130-dan çox azərbaycanlı Sovet İttifaqı Qəhrəmanı adına layiq görülür. İkinci Dünya müharibəsində misilsiz qəhrəmanlıqlar göstərən oğullarımızdan biri də, iki dəfə Sovet İttifaqı Qəhrəmanı adına layiq görülmüş, general-mayor Həzi Aslanov olub. O, bu ada iki dəfə layiq görülən yeganə azərbaycanlıdır. Hal-hazırda onun Bakı şəhərindəki qəbri üzərində abidəsi ucaldılıb. 1969-cu ildə onun doğulduğu Lənkəran şəhərində ev-muzeyi istifadəyə verilib və 1983-cü il mayın 8-də isə, Lənkəranın mərkəzi hissəsində onun böyük heykəli qoyulub. Bakıdakı küçələrdən və metronun stansiyalarından biri Həzi Aslanovun adını daşıyır.
Diqqəti cəlb edən hal odur ki, hər il faşizm üzərində qələbənin tamam olması münasibətilə Həzi Aslanovun abidəsi çoxsaylı sakinlər, vəzifə sahibi olan şəxslər, hətta ölkə rəhbəri cənab İlham Əliyev tərəfindən də ziyarət olunur. Onun abidəsi önünə gül dəstləri qoyulub, xatirəsi bir daha yad olunur. Yəni, bu o deməkdir ki, İkinci Dünya müharibəsində misilsiz qəhrəmanlıqlar göstərərək Sovet İttifaqı Qəhrəmanı adına layiq görülən Həzi Aslanovun adı, bu gün cənab Prezident tərəfindən də hörmət və ehtiram əlaməti olaraq yad olunur. O halda sual oluna bilər ki, görəsən ölkə rəhbərinin hörmət-ehtiram bəslədiyi bu tarixi şəxsə qarşı İradə Gülməmədova niyə sayğısızlıq göstərir? Səbəb nədir ki, bugünə kimi Həzi Aslanovun adını daşıyan küçədə yaşayan sakinlərin çoxsaylı müraciətləri, Abşeron RİH-i başçısı tərəfindən saya salınmayıb? Bu da onu söyləməyə əsas verir ki, cənab İlham Əliyevin sayğı ilə yanaşdığı, hörmət-ehtiram bəslədiyi bu tarixi şəxsə Abşeron RİH-i başçısı İradə xanım Gülməmədova, hansısa maraqları çərçivəsində hələ də hörmətsizlik bəsləməkdə davam edir. Əgər bu belə deyilsə, o halda Abşerona rəhbərlik edən bu xanım, ölkə rəhbərinin hörmət və ehtiram bəslədiyi Həzi Aslanovun adını daşıyan küçədə kanalizasiya probleminin həll olunması yöndə addımlarını atıb, sakinlərin rahatlığını təmin edərdi. Deməli, ...
P.S.Hörmətli oxucular! Bizim yazdıqlarımıza kiminsə şübhəsi varsa, o halda iki dəfə Sovet İttifaqı Qəhrəmanı adına layiq görülmüş, general-mayor Həzi Aslanovun adını daşıyan küçədən çəkilmiş şəkillərə diqqətlə nəzər yetirsin və lazımi qiymətini də versin.
Mövzunu diqqətdə saxlayacağıq.
Nyus.Az
[media=https://www.youtube.com/watch?v=2La0kA8BZKQ&feature=youtu.be]