Hacı Zeynalabdin Tağıyev adına qəsəbənin Şirvan yaşayış massivinin sakinləri “od püskürürlər”
Sumqayıt şəhəri, Hacı Zeynalabdin Tağıyev qəsəbəsinin “Şirvan” yaşayış məntəqəsi sakinlərinin illərdən bəri üz-üzə qaldıqları problemlərin varlığını görməmək üçün ya kor olmaq, ya da nankor olmaq lazımdır. Belə ki, bir-iki gün bundan öncə redaksiyamıza üz tutan və üz-üzə qaldıqları problemlərin həllinə kömək əlimizin uzadılmasını xahiş edən yaşayış məntəqəsi sakinlərindən Malik Əzizov, Tahir İmaməliyev, Rəfail Abbasov, Alim Abdürəhmanov və Əjdər Cəfərov bildirdilər ki, “Uzun illərdir ki, adı çəkilən bu yaşayış məntəqəsində yaşayırıq. Zaman-zaman kənardan bura köçən, torpaq sahələri alıb yeni ev tikən şəxslərin hesabına qəsəbəmiz böyük bir yaşayış məntəqəsinə çevrilib. İnsafən onu da bildirək ki, yaşayış məntəqəmiz böyüdükcə, sakinlərin sayı çoxaldıqca bəzi problemlərimizin həlli yöndə müəyyən addımlar da atılıb. Amma uzun illərdən bəridir ki, bu yaşayış məntəqəsində kanalizasiya problemimiz həll olunmur ki, həll olunmur. Yaşadığımız yaşayış məntəqəsi Xəzər dənizinin bir neçə yüzmetrliyində, bəlkə də daha yaxın məsafədə yerləşir. Belə bir səbəb üzündən də, sakinlərin axıtdıqları çirkab suları Xəzər dənizinə tökülür. Amma, necə? Elə bu necəliyin nəticəsidir ki, axıdılan çirkab suları sakinlərin dərdinin üstünə yeni bir dərd gətirməkdədir. Çünki, sovet dönəmində axıdılan çirkab suları xüsusi yerlərə tökülürdü və lazımi avadanlıqlarla təmizləndikdən sonra dənizə axıdılırdı. İndi həmin xüsusi yerlərdən və lazımi avadanlıqlardan heç bir əsər-əlamət qalmayıb. Yəni, itbat olub. Bu gün isə, axıdılan çirkab suları üstüaçıq vəziyyətdə, əraziyə yayılmaqla dənizə tökülür. Bu da vaxtilə “Şirvan” yaşayış məntəqəsi sakinlərinin və digər şəxslərin yay aylarında çimərlik kimi istifadə etdikləri ərazilərin bərbad hala düşməsinə səbəb olub. Hələ bu azmış kimi, yaşayış məntəqəsinin dənizə tərəf olan hissəsinin qamışlıqlarla örtülməsinə, əmələ gələn gölməçələrdə qurbağaların, müxtəlif gəmiricilərin, mənşəyi bilinməyən xəstəliklərin, hətta tülkülərin də peyda olmasına səbəb olub. Yayın bu isti vaxtlarında ətraf ərazidə elə bir iy-üfunət əmələ gəlir ki, sanki burada yaşamaq mümkün olmur. Bəzən çirkab suların hesabına əmələ gələn gölməçələrdə azyaşlı uşaqlar oynayırlar ki, bu da onların minbir xəstəliyə düçar olmalarına səbəb olur. Yaşayış məntəqəmizin bəzi yerlərində toparlanmış və aylarla təmizlənməyən zibiliklər də, ətraf ərazilərin antisanitariya mənbəyinə çevrilməsində mühüm rol oynayır. Dəfələrlə aidiyyəti qurumları belə bir ciddi problemlərin varlığı haqda məlumatlandırsaq da, hər dəfə ünvanladığımız müraciətlərimiz qulaqardına vurulub. Yəni, yazıb xahiş etmişdik ki, heç olmazsa çirkab suların axdığı yerlərə müəyyən diametrli borular basdırılsın ki, çirkab suları ətraf ərazilərə yayıla bilməsin. Təəssüflər olsun ki, qəsəbə icra nümayəndəliyi, qəsəbə bələdiyyəsinin rəhbərliyi, Sumqayıt ŞİH-tində belə bir problemlərin varlığına cavabdehlik daşıyan vəzifə sahibləri, hətta “Azərsu”nun rəhbərliyində olanlar belə, hələ ki, həyacan təbilimizə məhəl qoymurlar. İndi biz dərdimizi kimə deyək ki, illərdən bəzi üz-üzə qaldığımız problemlərin həllinə nail ola bilək? Axı, biz də bu ölkənin vətəndaşlarıyıq, bizim də Konstitusion hüquqlarımız var!
Biz “Şirvan” yaşayış məntəqəsi sakinləri olaraq media vasitəsilə Azərbaycan Respublikasının Ekologiya və Təbii Sərvətlər Naziri cənab Muxtar Babayevə üz tuturuq və ondan da xahiş edirik ki, biz sakinlərə kömək əlini uzatsın. Çünki, yaşayış məntəqəmizdən axıdılan çirkab suları Xəzərin ətraf zolaqlarının çirkləndirilməsində ciddi rol oynayır. Ona görə də istərdik ki, adı çəkilən Nazirliyin əməkdaşları yaşadığımız əraziyə baxış keçirsinlər və müvafiq addımlarını da atsınlar. Bəlkə o halda dərdimizə əlac edən tapılar. Yoxsa…”
Araşdırmamız davam edəcək.
