Lerikdə Sultan və Xalid Mirzəyev qardaşları meşəyə qənim kəsiliblər. Qardaşlar 2012-ci ildən başlayaraq ta 2022-ci ilədək 4-5 dəfə inzibati qaydada məsuliyyətə cəlb olunaraq müxtəlif məbləğlərdə cərimə olunublar. Axırıncı dəfə isə 2022-ci ilin dekabr ayında növbəti qanunsuz əməlləri üstə yaxalanan Mirzəyevlərə Cinayət Məcəlləsinin 259.2.3-cü maddəsi ilə iş açılıb.
Ancaq hazırda işləri məhkəmədə ola-ola özlərinə qoyulmayan Sultan və Xalid qardaşları növbəti cinayətlərini törədiblər. Belə ki, onların tədarük etdikləri yük maşını avqustun 12-də polis tərəfindən saxlanılıb. Məlum olub ki, yük maşınının kuzovuna alt tərəfdə işlik material yığan oğrular üst hissəyə oduncaq yığaraq örtməyə çalışıblar. Bu isə qardaşların əvvəllər də sınaqdan keçirdikləri cinayət metodudur. Əgər onların cərimələnmələrinə səbəb olan aşkarlanmış əməllərinin sayı 5-6-dırsa, təxmin etmək olar ki, üstü açılmamış əməlləri dəfələrlə çoxdur. Üzə çıxmayanların sırasında isə 1 saylı Regional Ekologiya və Təbii Sərvətlər İdarəsinin mühafizəçilərinin təmənna qarşılığında göz yumduqları, əlbir surətdə həyata keçirdikləri də az deyil. Amma yenə sə sağ olsun, Lerik Rayon Polis Şöbəsinin vicdanlı əməkdaşları ki, meşə qənimlərinə güzəştə getməyiblər. Ümid edirik ki, Lerik rayon Məhkəməsinin sədri cənab Atabəy Kiçibəyov da haqqın tərəfində durub qanunun aliliyini üstün tutacaq, cinayətkar Mirzəyev qardaşlarının layiqli cəzalarını almaları üçün əlindən gələni əsirgəməyəcəkdir. //azerinfo.az//
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!
Nyus.Az
