Abşeron rayonu, Mehdiabad qəsəbəsi Qarant” qaçqın şəhərciyi ilə üzbəüz məhəllədə, M.Gülgün küşəsində fərdi evlərdə yaşayan Məmmədov Nizami Məhəbbət oğlu və daha 7 nəfər digər sakinlər redaksiyamıza göndərdikləri müraciətnamədə yazırlar ki, 5 il əvvəl yaşadıqları məhəllə “Azərsu” ASC tərəfindən su xətti ilə təmin edilmiş, kanalizasiya xətti çəkilməsi üçün də ərazinin topoqrafik ölçüləri aparılmış, hətta layihə-smeta sənədlərinin artqı hazır olduğu onlara bildirilmişdir: “Bizdən aşağı paralel küçələrdə artqı kanalizasiya xətləri çəkilib istifadəyə verilmişdir. Yəni, sistem Mehdiabadın ümumi kollektoruna da qoşulub”.
Sakinlər həmçinin bildirirlər ki, onların evləri yerləşən küçənin başında kanalizasiya xəttinin çəkilməsinin davamı adı ilə işlərə başlanıb və hər sakindən 500 manat pul yığılıb: “Özünü “Azərsu” ASC-nin subpodratçısı kimi təqdim edən Mirzəliyev Nofəl Nəriman oğlu həqiqətən də küçənin başına qədər işləri görüb xətti ümumi ana kollektora qoşdu. Kanalizasiya xətti bizim evlərin 70-80 metr məsafəsinə kimi çəkildi. Hazırda biz 8 nəfər sakinlərə 500 manat pul müqabilində bizə də kanalizasiya xətti çəkiləcəyi və xəttə qoşulacağı söz verilmiş və artıq bizdən pulun əsas hissəsi alınmışdır. Hətta lazım olan materialların hamısı da bizim pulumuz hesabına alınıb əraziyə gətirilməsinə baxmayaraq, iki aydır bir iş görülməmişdir. Hazırda adı çəkilən bu şəxs müxtəlif bəhanələr gətirərək aradan çıxıb. Bu vəziyyətdən istifadə edən və vaxtı ilə onunla əlbir olub bu işlərdə yaxından iştirak edən Vidadi adlı qonşu sakin dələduzluq edərək biz 8 nəfərin çəkilməli xəttə qoşulmasının mümkün olmayacağını bildirir. Gah deyir aşağı küçə sakinlərindən icazə alınmalıdır. Guya ki, bunlar sümumi xəttə qoşulmağa görə “Azərsu” ASC və yol idarəsinə 20-25 min manat pul veriblər. Gah da deyirlər, yenidən “Azərsu” ASC-nə pul verilməlidir. Bir sözlə, biabırçı bir oyuun oynayırlar. Bu işin başında duran da əsas bu iki nəfərdir — yerli sakin, qonşu naxçıvanlı Vidadi və bu işlərin bir hissəsini yerinə yetirmiş, “Azərsu” ASC-də yuxarı vəzifəli qohumu olduğunu bildirən Nofəl Mirzəyev…”
Sakinlər hesab edirlər ki, Nofəlin həqiqətən də “Azərsu” ASC-də yaxını olmasaydı, bu işləri görə bilməz, həqiqətən də çəkilən xətti ana kollektora qoşa bilməzdi: “Bu gün ərazidə bir metr yeri qazan kimi polis və “Azərsu” nümayəndələri həmən orda olurlar və icazə sənədləri tələb edirlər. Atalar demişkən, od olmasa, tüstü çıxmaz. Bu boyda işləri görüb, sonda biz 8 nəfərin xəttini çəkib ümumi kollektora qoşmaq üçün yaradılmış problemin başında bizdən 500 manatdan əlavə 300 manat tələb etməkləri, işi saxlamaqları heç bir araya sığmır”.
Vətəndaşlar xahiş edirlər ki, məsələ KİV-də ictimailəşdirilsin və göstərdikləri faktın araşdırılması, problemin həlli üçün köməklik göstərilməsi xahişləri “Azərsu” ASC rəhbərliyinə çatdırılsın. //Deryaz.az//
Nyus.Az olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!
Nyus.Az
