Eldar Əzizovla Rəşid Ağayevin şərikli deyildiyi restoran, piyada yolunu kəsdi
Paytaxtın Nizami rayonunda həmişə qanunsuz tikili problemi olub. Rayonda bu müstəvidə məmur özbaşınalığı o həddə çatıb ki, zavodların ərazisi belə satılıb. Hətta Heydər Əliyev Fondunun vitse-prezidenti Leyla Əliyevanın təşəbbüsü ilə Bakıdakı binaların həyətlərinin ekoloji cəhətdən təmiz və abad edilməsi, şəhər ekologiyasının sütununu təşkil edən yaşıllıqların bərpası, sağlam həyat tərzinin formalaşdırılması, sakinlər üçün təhlükəsiz və rahat yaşam şəraitinin yaradılması məqsədilə “Bizim həyət” layihəsi çərçivəsində salınan parkda belə qanunsuz olaraq restoran tikilməsi narazılığa səbəb olmuşdu. Doğrudur, sakinlərin etirazı KİV-də ictimailəşəndən sonra həmin restoran sökülmüşdü.
Amma bu günlərdə aşkarladığımız bir neçə fakt əminliklə deməyə əsas verir ki, rayonun adı Heydər Əliyev Fondu ilə əlaqədar olmayan başqa ərazilərində qanunsuz tikililərin, obyektlərin tikilməsi adi, sökülməsi isə istisna haldır və bu mənfi tendensiya artan templə davam etməkdədir. Şahidi olmuşuq ki, Qarayev prospekti – 7 ünvandakı binanın zirzəmisi dağıdılaraq birinci mərtəbəsinin önündə restoran inşa olunub. “Fort Beer” adı qoyulan bu təzə restoran səkinin piyada yoluna qədər olan 7 metrlik eninin 6 metrini zəbt edib. Sözügedən ünvanda apardığımız foto və videoqeydlərdən də aşkar görünür ki, hətta restoranın hüdudları qonşuluğundakı avtobus dayanacağından çox piyada yolunu daha çox kəsib. Qarşısında iplərə düzülmüş rəngbərəng üçbucaq kağız bayraqcıqlardan görünür ki, restoranın açılışına hazırlıq işləri artıq başa çatıb və yaxın günlərdə fəaliyyətə başlayacaq.
Yerli sakinlərin dediklərinə görə restoran Bakı Şəhər İH-nin tikinti məsələləri şöbəsinin müdiri Rəşid Ağayevindir.( Rəşid Ağayevin Bakı şəhərində onlarla obyekti də var. Daha geniş gələn sayımızda)
Məsələ ilə bağlı rəsmi mövqe öyrənmək üçün ilk üz tutduğumuz şəxs Nizami Rayon İcra Hakimiyyətinin (RİH) memarı Novruz Rzayev oldu. Memar bildirdi ki, Nizami RİH-nin memarlıq şöbəsinin belə məsələləri araşdırmaq və qarışmaq səlahiyyəti yoxdur və suallarımızı Bakı ŞİH-nə ünvanlamalıyıq. Ümumiyyətlə, tikintinin getməsindən məlumatının olub-olmadığını soruşduqda isə bildirdi ki, yalnız inşa işi başa çatandan sonra xəbər tutub.
Eyni qaydada Qarayev prospekti – 15 ünvanda da binanın birinci mərtəbəsində tikinti işlərinin aparıldığının şahidi olduq və çəkilişlər apardıq.
Növbəti addımda Bakı ŞİH-nin mətbuat xidməti ilə əlaqə saxladıq. Xidmətin katibi Mətin müəllim öz növbəsində ŞİH rəhbərliyinin məsul vəzifəli şəxslərinin sözügedən qanunsuz tikinti işlərinə rəvac vermələri barədə məlumatı təkzib edərək bildirdi ki, ümumiyyətlə meriya rəsmilərinin belə bir səlahiyyətləri yoxdur. Belə ki, tikinti işlərinə rayonun baş memarı ilə şəhər Arxitektura İdarəsi icazə verə bilərlər. Qarşılaşdığımız bürokratik əngəllərdən dolayı Bakı ŞİH başçısı cənab Eldar Əzizovun özünün və Arxitektira İdarəsinin mətbuat xidmətinin vatsap nömrələrinə mesaj şəklində faktları əks etdirən foto-video materialları və səs yazısını göndərsək də, susqunluqla qarşılandı.
Nizami rayon Mənzil Kommunal Təsərrüfatı Birliyinin rəisi isə bildirdi ki, mən bu vəzifəyə təzə təyin olunmuşam. Heç nədən də xəbərim yoxdur. Biz ona xatırlatdıq ki, siz 6 aydır bu vəzifəyə təyin olunmusunuz, tikinti işləri isə hal- hazırda indi gedir. O, bu sualımızdan da yayındı.
Bütün bunlar göstərir ki, Bakıda istər şəhərin, istərsə də rayonların rəhbərliyinə kimlərin başçı vəzifəsinə gətirilmələrindən asılı olmayaraq, ərazilərin qanunsuz satışı rəhbər vəzifəli şəxslərin vaz keçə bilmədikləri əsas gəlir mənbələrindəndir və baş memarlar, mənzil kommunal təsərrüfatı birliklərinin direktorları bu şıdırğı gedən alverin qarşısını almağa deyil, rahat baş tutmasına xidmət edən kiçik funksionerlərdir.
Xatırladaq ki, Arif Qasımov 2020-ci ilin iyul ayında vəzifəsindən azad olunandan sonra Nizami RİH-nə başçı vəzifəsinə təyinat yoxdur. Həmin vəzifəni başçının 1-ci müavini Qərib Məmmədov icra edir.
P.S. Onu da, qeyd edək ki, Bakı şəhər İcra Hakimiyyətinin Tikinti şöbəsinin müdiri Eldar Əzizovla yaxın dostdur və vo,vaxtilə Nizami rayon İcra Hakimiyyətində məsul vəzifədə işlədiyindən bu rayonun dəlmə-deşiyini yaxşı tanıyır.
Adı gedən ünvanlardan sorğumuza cavab ala bilmədiyimizdən ümid edirik ki, yuxarı qurumlar sorğularımızı cavablandırazaqlar.
Odur ki, mövzuya yenidən qayıdacağıq
Deryaz.az
