“Azərxalça” şirkətinin sabiq rəhbəri, korrupsiya ittihamı ilə cinayət məsuliyyətinə cəlb olunmuş Vidadi Muradovun onkoloji xəstəliyinin şiddətlənməsi səbəbilə həbsdən azad edilməsi ilk əvvəl cəmiyyətdə heç də birmənalı qarşılanmasa da, onun çox keçmədən dünyasını dəyişməsi dövlətimizin humanist siyasətinin növbəti təzahürünü ortaya çıxardı. Mərhumun az-çox saleh əməlləri də varmış ki, həbsxanada keçinmədi. Allah rəhmət eləsin.
V.Muradovun istintaqının getdiyi müddətdə oğlu Sabunçu Rayon Polis İdarəsinin rəisi Cavid Muradovun tutduğu polis rəisi vəzifəsindən kənarlaşdırılmaması diqqətdən yayınmamışdı. Ehtimal olunurdu ki, Cavid Muradov vəzifə başında qalsa da, hərəkətlərinə göz qoyulduğunu nəzərə alıb, ictimai qınağın obyektivinə başqa vaxtlarda olduğundan daha tez tuş gələcəyindən ehtiyatlanıb hardasa daha əvvəlki kimi qanunsuzluqlara göz yummaz, rüşvətxorluğa rəvac verməz. Bu mövzuda qələmə aldığımız əvvəlki yazıda təəssüflə bildirmişdik ki, Sabunçu rayonunda polis neqativ hallara göz yummaqda davam edir. Belə ki, mərkəzi küçələrdə ticarət “nöqtələrindən” pul yığımını rəis özünün inandığı şəxslərin – əsasən də təqaüddə olan keçmiş polis işçiləri Etibarın, Adilin əli ilə həyata keçirir. Bundan başqa, məqalədə həmçinin ərazidə tanınmış “Qaqo” restoranında baş vermiş və bir neçə şəxsin ciddi xəsarət alması ilə nəticələnən kütləvi davanın iştirakçılarının sahə polis inspektoru Müqəddəs tərəfindən cəzasız buraxılmasını da qınamışdıq, gedişatı video-qeydə alınan həmin hadisənin polisin nüfuzuna, asayiş keşikçilərinə olan etimada xələl gətirdiyini qeyd etmişdik. “Nöqtələrdən” pulyığan şəxslərin adlarını da qeyd etdiyimiz məqaləni müşayiətedici məktuba qoşma edib Daxili İşlər naziri çox hörmətli Vilayət Eyvazov cənablarına da göndərmişdik. Ümid edirdik ki, məqalədə ehtiva olunan məsələlər Nazirlik səviyyəsində nəzarətə götürülər və başı Sabunçu rayonu ərazisində küçə ticarətindən, qeyri-leqal, yarım-leqal fəaliyyət göstərən obyektlərdən, vergidən yayınan “toçkalardan” pul yığmağa qarışan Cavid Muradov rəhbərlik tərəfindən layiq olduğu töhməti alar.
Ancaq çox təəssüf ki, rəvac verdiyi qanunsuzluqlara görə Cavid Muradova “gözün üstə qaşın var” deyən yoxdur. Etibar yenə də 99 RH 769 nömrə nişanlı “Lexus” maşını ilə pul toplamaqda davam edir, pul verməyənin piştaxtasının “şmon” edilməsi, dağıdılması tədbirini isə Cavid Muradovun digər qoçusu - əvvəllər manqa komandiri olmuş Dabko ləğəbli Davud 90-AR 665 nömrəli maşınla həyata keçirir. Aldığımız son məlumata görə, cəzasız, tənbehsiz qalacağına əmin olan rayon polis rəisi qəddarlıqda bir az da uzağa gedərək, Vətən müharibəsi qazisinin evinin sökülməsinə dəstək verib. Halbuki, Sabunçu rayonu ərazisində Cavid Muradovun işlədiyi dövrdə sənədləri qaydasında olmayan yüzlərlə fərdi evin tikintisinə polis tərəfindən göz yumulub.
Mövzuya qayıdacağıq.
Nyus.Az
