Azərbaycanın 5-ci Kənd Təsərrüfatı naziri İnam Kərimov sözügedən vəzifəyə təyin olunduğu ilk günlərdən başlayaraq göstərmək istədiyi islahatçı obrazını hələ də davam etdirir. Tez-tez rayonlara səfərlər edir, gah pambıq sahələrində, gah da taxıl zəmilərinin içində şəkillər çəkdirir və ancaq gələcək üçün nikbin proqnozlar verir. Respublikanın bir çox rayonlarından olan kənd sakinlərinin subsuduyaların qəsdən gecikdirilməsi ilə bağlı şikayətləri isə səngimək bilmir və bu barədə elektron kütləvi informasıya vasitələrində kifayət qədər məlumatlara rast gəlmək mümükündür. İslahatçı Kənd Təsərrüfatı nazirimiz isə hələ də özünü reklam etdirməklə məşğuldur.
Məlum olduğu kimi Kənd Təsərrüfatı Nazirliyi ölkəmizin yalnız aqrar sahəsinə cavabdehlik daşımır. Sözügedən nazirlik həm də bu sahədə elmi-tədqiqat işlərin aparılmasına, kənd təsərrüfatının bir çox sahələri üçün yeni mütəxəsislərin hazırlanmasına da məsul bir orqandır. Bunun üçün Kənd Təsərrüfatı Nazirliyinə tabeli onlarla elmi-təqiqat instutları var ki, İnam Kərimov buralara da özünə yaxın, özü kimi gəncləri yerləşdirməklə aqrar sahədəki islahatların güya elmi-tədqiqat işlərini aparırlar. Bu mövzuya biz ayrıca toxunmağı planlaşdırırıq.
Azərbaycan Dövlət Aqrar Universiteti də Kənd Təsərrüfatı Nazirliyinə tabeli bir ali təhsil müəssisədir və yuxarıda qeyd etdiyimiz kimi burada hazırlanan gənc mütəxəsislərə aqrar sahənin incəlikləri ilə yanaşı, idarəetmənin təşkili də öyrədilir. Amma necə? Əvvəlcə rektoru İbrahim Cəfərov olan Azərbaycan Dövlət Aqrar Universitetində idarətmənin təşkilinə nəzər salaq. Universitetdə baş verənlərlə bağlı sosial şəbəkələrdə və elektron kütləvi informasıya vasitələrində yetərincə məlumatlar əldə etmək olar. Bizim apardığımız araşdırmalar isə fərqlidir,yenidir.
Azərbaycan Dövlət Aqrar Universiteti tərəfindən 2021-ci ildə keçirilmiş kotirovka sorğuları barədə ətraflı məlumatlar almaq üçün Aktualinfo.org redaksiyasının 6 sentyabrda ünvanladığı elektron sorğuya ali təhsil müəssisəsinin Tender Komissiyası cavab vermədi. Bunu mətbuata qarşı biganəlik, sayğısızlıq da adlandırmaq olar. Amma bu, ya sözügedən universitetdə kargzarlıq işinin düzgün təşkil olunmadığından, ya da bir çox gizlinlərin üstünün açılması qorxusu ilə bağlı olmasından da xəbər verir. Hansı ki, Aqrar Universitetin Tender Komissiyası bunları etdi. Yəni açdı, 2021-ci ilin mart ayında keçirilimiş kotirovka sorğusunun nəticələrini sentyabrın 7-də Dövlət satınalmalarının rəsmi portalına yerləşdirməklə.
Məsələn, 06.03.2021-ci ildə dəftərxana ləvazimatı və təsərrüfat mallarının alınması üzrə elan olunmuş kotirovka sorğusunda iştirak etmək üçün sənədlər 07.03.2021- 19.03.2021-ci il tarixinədək qəbul olunub. Amma sorğunun nəticəsi 07.09.2021-ci ildə Dövlət satınalmalarının rəsmi portalına yerləşdirilmiş və “İNCİ GROUP OF COMPANİES” Qapalı Səhmdar Cəmiyyəti ilə 30 255.32 manat məbləğində satınalma müqaviləsinin bağlandağını göstərilmişdir.
06.03.2021-ci ildə ehtiyyat hissələrinin alınması üzrə elan olunmuş kotirovka sorğusunda iştirak etmək üçün sənədlər 07.03.2021- 19.03.2021-ci il tarixinədək qəbul olunub. Amma sorğunun nəticəsi 09.09.2021-ci ildə Dövlət satınalmalarının rəsmi portalına yerləşdirilmiş və “NƏZRİN-Z” Məhdud Məsuliyyətli Cəmiyyəti ilə 23 849 manat məbləğində satınalma müqaviləsinin bağlandağı göstərilmişdir.
Diqqət yetirin !!! 05.03.2020-ci ildə cari təmir ücün mal-material üzrə elan olunmuş kotirovka sorğusunda iştirak etmək üçün sənədlər yalnız 05.03.2020 03:12 tarixinədək qəbul olunub. Amma sorğunun nəticəsi barədə məlumatlar bir il 7 aydan sonra, 09.09.2021-ci ildə Dövlət satınalmalarının rəsmi portalına yerləşdirilmiş və “QRANDAUT” Məhdud Məsuliyyətli Cəmiyyəti ilə 45 145 manat məbləğində satınalma müqaviləsinin bağlandağı göstərilmişdir.
15.06.2021-ci ildə sair torpaq tikili və avadanlıqların alınması üzrə elan olunmuş kotirovka sorğusunda iştirak etmək üçün sənədlər 16.06.2021-dən, 29.06.2021-ci il tarixinədək qəbul olunub. Amma sorğunun nəticəsi 09.09.2021-ci ildə Dövlət satınalmalarının rəsmi portalına yerləşdirilmiş və “KAMA-M” Məhdud Məsuliyyətli Cəmiyyəti ilə 7 320 manat məbləğində satınalma müqaviləsinin bağlandağını göstərilmişdir.
02.07.2021-ci ildə dərman, sarğı ləvazimatlarının və materialların alınması üzrə elan olunmuş kotirovka sorğusunda iştirak etmək üçün sənədlər 03.07.2021-dən 16.07.2021-ci il tarixinədək qəbul olunub. Amma sorğunun nəticəsi barədə məlumatlar 09.09.2021-ci ildə Dövlət satınalmalarının rəsmi portalına yerləşdirilmiş və fiziki şəxs Əmiraslanov Aslan Nurəddin oğlu ilə 17 786 manat məbləğində satınalma müqaviləsinin bağlandağını göstərilmişdir.
02.07.2021-ci ildə bioloji aktivlərin alınması ( toxum və tinglərin alınması) üzrə elan olunmuş kotirovka sorğusunda iştirak etmək üçün sənədlər 03.07.2021-dən 16.07.2021-ci il tarixinədək qəbul olunub. Amma sorğunun nəticəsi barədə məlumatlar 09.09.2021-ci ildə Dövlət satınalmalarının rəsmi portalına yerləşdirilmiş və “AUTFİLDER” Məhdud Məsuliyyətli Cəmiyyəti ilə 18 936 manat məbləğində satınalma müqaviləsinin bağlandağını göstərilmişdir.
Qeyd edək ki, Kommersiya qurumunun hüquqi şəxslərin dövlət reyestrinə daxil edilmiş məlumatlarında “QRANDAUT” və “AUTFİLDER” Məhdud Məsuliyyətli Cəmiyyətlərinin İqtisadiyyat Nazirliyi yanında Dövlət Vergi Xidmətinin 13 saylı Ərazi Vergilər İdarəsində 02.12.2014-cü il tarixində dövlət qeydiyyatına alındıqları bildirilir. Nizamnamə kapitalları 5 manat olan MMC-lərin hüquqi ünvanı BALAKƏN RAYONU, BALAKƏN ŞƏHƏRİ, FÜZULİ, ev dalan 1, ev 5, m, qanuni təmsilçisinin isə Nəbiyev Gündüz Vəzir oğlu olduğu göstərilir.
“KAMA-M” və “NƏZRİN-Z” Məhdud Məsuliyyətli Cəmiyyətləri isə.
Kommersiya qurumunun hüquqi şəxslərin dövlət reyestrinə daxil edilmiş məlumatlarında “KAMA-M” və “NƏZRİN-Z” Məhdud Məsuliyyətli Cəmiyyətlərinin İqtisadiyyat Nazirliyi yanında Dövlət Vergi Xidmətinin 9 saylı Ərazi Vergilər İdarəsində, etni gündə,08.05.2015-ci il tarixində dövlət qeydiyyatına alındıqları bildirilir. Nizamnamə kapitalları 10 manat olan MMC-lərin hüquqi ünvanı da eynidior. AĞDAŞ RAYONU, AĞDAŞ ŞƏHƏRİ, İ.QARADAĞLI, ev 17, m. 0. Qanuni təmsilçiləri isə “KAMA-M” MMC-də Məmmədova Kəmalə Hüseyn qızı, “NƏZRİN-Z” MMC-də isə Ağayev İlham Rişad oğlu olduğu göstərilir.
Bəs Azərbaycan Dövlət Aqrar Universiteti tərəfindən ictimaiyyətə açıqlanmayan digər kotirovka sorğularının nəticələri? Qeyd edək ki, Dövlət satınalmalarının rəsmi elektron portalına yerləşdirilmiş məlumatlada 2020-21-ci illərdə universitet tərəfindən 20 kotirovka sorğusunun keçirilməsi barədə elan yerləşdirilib. Aktualinfo.org-un sorgusundan sonra onlardan yalnız 6-nın nəticələri barədə məlumat açıqlanıb ki, göründüyü kimi eyni şəxsə məxsus MMC-lərlə, eyni ünvanda qeydiyyata alınmış MMC-lərlə satınalma müqaviləsi bağlanıldığı üzə çıxdı. Aqrar Universitetin Tender Komissiyasının nəticələrini açıqlamadığı digər kotirovka sorğuları? Ola bilsin ki, bu kotirovka sorğularının bəziləri ləğv olunub. Amma apardığımız araşdırmalar zamanı kotirovka sorğularının ləğv olunması barədə də Aqrar Universitetin heç bir elanına rast gəlmədik. Halbu ki, kotirovka sorgusu ləğv olunduqda da universitetin Tender Komissiyası mütləq elan verməli idi.
Göründüyü kimi, rektoru İbrahim Cəfərov olan Azərbaycan Dövlət Aqrar Universitetinin Tender Komissiyası bu məlumatları ya bilərəkdən gizlədib, ya da tender və kotirovka sorgularının təşkilini bilmirlər. Bu adamlar hələ bilmir ki, əvvəlcədən müəyyən olunmuş malların(xidmətlərin) satınalınması üçün kotirovka sorğusu elanları Dövlət satınalmalarının rəsmi elektron portalına yerləşdirilir. Sonra Dövlət Satınalmaları haqqında Azərbaycan Respublikasının qanununa uyğun olaraq iddiaçıların sənədlərinin təqdim etməsi üçün 10 bank günü müəyyən edilir.
Kotirovka sorğusu zərflərinin aşılması proseduru zamanı iddiaçılar tərəfindən təqdim edilmiş zətflər onların səlahiyyətli nümayəndələrinin bilavasitə müşahidəsi altında açılır və qiymət təklifləri elan edilir.
Daha sonra tender komissiyası tərəfindən müsabiqələrin nəticələrinə dair yekun protokolları tərtib edilərək təsdiq edilməsi üçün Azərbaycan Respublikası İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə təqdim edilir. Yekun protokollara İqtisadiyyat nazirliyində baxılır və təsdiq edilərək qeydiyyata alınmasından dərhal sonra müsabiqənin nəticələri barədə portalda bildirişlər dərc edilir.
Amma biz xüsusilə qeyd etmək istərdik ki, 2019-cu ildən sonra Azərbaycan Dövlət Aqrar Universitetinin Tender Komissiyasınin keçirdiyi bütün kotirovka sorğuları barədə Dövlət satınalmalarının rəsmi portalının bazasında heç bir məlumat yerləşdirilməyib. Dövlət satınalmalarının rəsmi portalına yerləşdirilmiş məlumatlardan da görsəndiyi kimi Azərbaycan Dövlət Aqrar Universitetinin Tender Komissiyası 2020-2021-ci illərdə bir çox malların və xidmətlərin satınalması üzrə kotirovka sorğularının keçirilməsi barədə elan versə də, keçirilmiş kotirovka sorğularının nəticələri barədə məlumatları gizlətmiş, müqavilələrin bağlanması barədə heç bir məlumat verməmiş, ayrılan vəsaitlər barədə məlumatları gizlətmişdir.
Qeyd edək ki, apardığımız araşdırmalar zamanı Azərbaycan Dövlət Aqrar Universitetinin məbləği yüksək olan tenderlərini birbaşa Kənd Təsərrüfatı Nazirliyi həyata keçirdiyi məlum oldu. Görünür nazir İnam Kərimovla rektor İbrahim Cəfərovun belə anlaşıblar. Məbləği 50 min manatadək olan kotirovka sorgularına nəzarət İbrahim Cəfərova həvalə olunub. Böyük məbləğlərə nəzarət isə İnam Kərimovda qalıb. İbrahim Cəfərov da heç kim görmürmüş kimi, yavaş-yavaş, keçirdiyi kotirovka sorğularının nəticələrini gizlətməklə Balakəndə, Ağdaşda və kim bilir daha hansı kəndlərdə özünə yaxın adamların adına yaradılmış MMC-lər vasitəsi ilə dövlət vəsaitlərini talan edir. Kənardan baxan da elə bilir ki, İbrahim Cəfərov aqrar sahənin inkişaf etdirilməsi üçün gənc mütəxəssislər hazırlayan ali təhsil ocağının rəhbəridir.
Aktualinfo.org
