Tanınmış yazıçılarımızdan birinin məşhur povesti belə adlanır : Geriyə baxma, qoca...
Bunu nə üçün yada saldım ?
İnsan dönüb geri baxanda keçdiyi həyat yolu, etdiyi pis-yaxşı əməllər gəlib gözünün önündən keçir.
Görəsən, Masallının sabiq, Ağcabədinin indiki icra başçısı Rafil Hüseynov dönüb geri baxsa, nələr görəcək ?
Görəcək ki, hansısa rayon qəzetində korrektordur. Amma ixtisasca korrektor olan adam öz əməllərini ömür boyu korrektə edə bilmədi.
Əgər öz əməllərini korrektə edə bilsəydi ölkədə rüsvay olan oğul böyütməzdi. Oğul da ki, nə oğul.
Bəli, cənab başçı dönüb geri baxanda polis zabiti olan oğlu Şəhriyar Hüseynzadənin vətəndaşı şalvarsız, tumançaq evindən apardığını görəcək.
İçki düşgünü olan həmin oğul avtoşluq edərək neçə nəfərin həyatını məhv edib, amma atasının hesabına sükan arxasında başqasının olduğunu pulla sübut edərək “sudan quru çıxıb”, hətta savadı olmasa da polis orqanlarına işə düzəlib, bunu biz demirik aaa bütün saytlar yazır.
Rafil Hüseynov dönüb geri baxanda Qarabağ şəhidinin statusunu ləğv etmək üçün nələr etdiyini görəcək.
Şəhid atasına kəllə atmağını görəcək, sahibkar qadını döydürməsi yadına düşəcək.
Yəni Rafil Hüseynov dönüb geri baxanda ancaq qara əməllər görəcək.
Deyirəm ki, Allah insana belə ömür bəxş eləməsin. Yaman dərddir, Rafil müəllim.
Dönüb geri baxanda görəsən ki, Qarabağ qazisi səndən dolanmaq üçün iş istəyir, sənsə ona 150 manat maaşla süpürgəçilik təklif edirsən.
Bu məqamda yadıma illər öncə baş vermiş bir ağır hadisə düşür.
Deməli, illər öncə 1-ci Qarabağ savaşında qazi olanların iş məsələsi müzakirə olunanda, o zamankı əmək və əhalinin sosial müdafiəsi naziri, Azərbaycanın Belarusdakı sabiq səfiri Əli Nağıyev demişdi ki, Sumqayıtda 5-10 ayaqqabı təmizləyən “budka” qoyaq və qazilər işləsin.
Rafil Hüseynov da belə məmurlardandır.
Rafil Hüseynov dönüb geri baxanda görəcək ki, Lələtəpə MMC təsis edib şəhidlərin abidələri üçün ayrılmış pulları tenderdə udur. Dünyada bundan ağır nə ola bilər, Rafil Hüseynov ?
Masallıda qəbristanlığı sökdürüb yerində obyektlər tikdirnməyin də gözlərinin önündən keçəcək, Rafil Hüseynov.
Düşünmürsən ki, haqqını yediyin, qəbrlərini sökdüyün, qanını pulla batırdığın insanlar bir gün o dünyada yaxandan yapışıb, sənin əlinə süpürgə verəcəklər ki, əməllərini təmizlə.
Amma sənin əməllərini təmizləməyə, süpürməyə heç bir “kommunxoz”un da imkanı yetməz.
Bütün bunları bilə-bilə hələ də kreslodan əl çəkmirsən, cənab başçı.
Artıq nəinki mənəvi, hətta fiziki cəhətdən də tükənmisən, bitmisən, yapışmısan kresloya, ay adam.
Hətta indiki şəkillərini də paylaşmağa utanırsan və gənclik şəkillərini yerləşdirirsən, rəsmi xəbərlərə.
Əslində insan qocalanda üzünə nur gələr, sənin isə əməllərin üzünə çıxır, ona görə də, güzgüdə də özünə baxmağa çəkinirsən.
Cənab Rafil Hüseynov, nə qədər gec deyil, çəkil yapışdığın kreslodan, onsuz da gəliblər, qapını döyürlər.
Atalar demişkən, ya zəlzələdən, ya da vəlvələdən.
Hazırlaş, getməyin zamanı çatdı, qoca Rafil.
Kreslonu burax, adam... //gundelik-baku.com//
